Statistika maħruġa mill-Uffiċċju Nazzjonali tal-Istatistika turi li fix-xahar ta’ Lulju, il-kuntratti ta’ bejgħ ta’ proprjetà naqsu bi kważi 20% meta mqabbla mal-istess xahar tas-sena 2022.
Fix-xahar li għadda, il-kuntratti taʼ bejgħ ammontaw għal 1,024, filwaqt li l-konvenji taʼ proprjetà residenzjali ammontaw għal 1,085, rispettivament. Meta mqabblin maʼ dawk irreġistrati fl-istess xahar taʼ sena qabel, dawn iċ-ċifri juru tnaqqis taʼ 19.2% fil-kuntratti taʼ bejgħ u żieda taʼ 13.6% fil-konvenji.
Bʼkollox, il-valur taʼ dawn il-kuntratti taʼ bejgħ taʼ proprjetà residenzjali li sar f’Lulju 2023 laħaq €278.3 miljun – tnaqqis taʼ 12.7% meta mqabbel mal-valur irregistrat fʼLulju tas-sena ta’ qabel.
Fix-xahar taʼ riferenza, 937 jew 91.5% tal-kuntratti kienu jikkonsistu minn xerrejja individwali (familji), filwaqt li kważi l-bqija tal-kuntratti l-oħra kienu magħmula minn kumpaniji. Il-valur tal-kuntratti li jinvolvu xerrejja individwali (familji) kien jammonta għal €206.9 miljuni, li huwa ekwivalenti għal 74.3% tal-valur kollu.
Intant, fʼLulju li għadda, kienu rreġistrati 1,085 konvenju taʼ proprjetà residenzjali, li huma riflessi fʼżieda taʼ 13.6 fil-mija fuq is-sena taʼ qabel. Ix-xerrejja individwali (familji) li kienu involuti fʼdawn il-konvenji kienu jgħoddu 993 jew 91.5 fil-mija, filwaqt li l-bqija kienu jinvolvu kumpaniji.
