Ħalliel li allegatament daħal fir-residenza tal-kriminal magħruf Għawdxi Paschalino Cefai spiċċa telaq b’idejh vojta u bi ġrieħi gravi fil-wiċċ meta t-tnejn spiċċaw fi ġlieda. Cefai allegatament aggredixxa u weġġa’ gravi lil Viktor Markovic, ċittadin Serb ta’ 39 sena li daħal fir-residenza tiegħu fi Triq il-Madonna taż-Ċiċri fiż-Żebbuġ, Għawdex għall-ħabta ta’ nofsinhar tal-Erbgħa.
L-ispettur Bernard Charles Spiteri qal lill-Maġistrat Bridgette Sultana li Markovic sofra ġrieħi serji ħafna f’imnieħru, li parti minnu ngidem minn Cefai waqt l-attakk. L-ispettur akkuża liż-żewġt irġiel separatament dwar l-inċident.
Markovic kien mixli bi dħul sfurzat bl-intenzjoni li jwettaq serq, li kien fil-pussess ta’ arma tan-nar fil-ħin li daħal fir-residenza, li għamel ħsara fil-proprjetà ta’ Cefai, li heddu u li sar reċidiv. Huwa kien mixli wkoll li kiser il-kundizzjonijiet tal-ħelsien mill-arrest preċedenti peress li bħalissa jinsab barra fuq garanzija fuq allegat hold-up fin-Naxxar is-sena l-oħra ma’ żewġ kompliċi. Huwa ngħata l-libertà proviżorja biss fi Frar ta’ din is-sena.
Cefai ta’ 43 sena ġie mixli li weġġa’ gravi lil Markovic, mingħajr l-intenzjoni li joqtlu. Huwa ġie mixli wkoll li fil-lejl tas-7 ta’ Awwissu li għadda darab ħafif lis-sieħba tiegħu waqt inċident mhux relatat, heddidha b’ġebel u oġġetti iebsin oħra, aggrediha, għamel ħsara fil-karozza tagħha, kkaġunaha biża’ mill-vjolenza u wettaq reat waqt li kienet fuq pleġġ f’każ separat. Huwa kien ingħata l-libertà proviżorja f’Jannar ta’ din is-sena minħabba ġlieda li kien involut fiha.
L-avukati difensuri ta’ Cefai Franco Debono u Charles Mercieca qalu lill-Qorti li l-klijent tagħhom kien rieqed meta Markovic daħal fil-propjetà tiegħu u li kien qed jaġixxi biss għal difiża personali. Minkejja oġġezzjonijiet għat-talbiet għall-ħelsien mill-prosekuzzjoni, il-Maġistrat Sultana akkordat lil Cefai il-ħelsien mill-arrest kontra depożitu ta’ €1,000 u garanzija personali ta’ €5,000. Markovic ingħata l-libertà proviżorja fuq depożitu ta’ €1,000 u garanzija personali ta’ €14,000.
L-Avukat Joseph Grech kien avukat difensur ta’ Markovic. Cefai huwa sinonimu ma’ diversi reati f’Għawdex, u darba kien deskritt minn imħallef bħala persuna li “terrorizza lil Għawdex” bl-attitudni aggressiva kontinwa tiegħu. Huwa kien ukoll kien involut f’inċident b’sikkina ġewwa awla tal-qorti ta’ Għawdex.
