Żewġ Taljani ta’ 44 sena u 40 sena, u Albaniz ta’ 40 sena, li allegatament jiffurmaw parti minn grupp ta’ kriminalità organizzata, kienu arrestati b’rabta ma’ traffikar ta’ droga.
Permezz ta’ investigazzjonijiet intensivi li saru fl-aħħar jiem, il-Pulizija ġabret informazzjoni li allegatament kien se jsir trasferiment ta’ droga f’pajjiżna. Sa minn knieni s-Sibt filgħodu, il-Pulizija bdiet osservazzjoni fuq vettura li fiha kien hemm Taljan ta’ 44 sena.
Wara xi ħin, il-pulizija ċċirkondaw il-vettura f’San Pawl il-Baħar u minn tfittxija f’basket nstabu għaxar pakketti li b’kollox jammontaw għal għaxar kilogrammi sustanza suspettata droga kokaina. Fl-istess ħin, il-pulizija kompliet bl-osservazzjoni fuq iż-żewġ persuni l-oħra, fejn dawn kienu arrestati ftit tal-ħin wara f’Ħal Qormi.
Mill-investigazzjonijiet li saru jirriżulta li d-droga misjuba tlaħħaq ‘il fuq minn €1.3 miljun fis-suq.
Il-Maġistrat tal-Għassa Claire Stafrace Zammit ġiet infurmata bis-sejba u ħatret inkjesta, filwaqt li l-investigazzjonijiet tal-Pulizija għadhom għaddejjin.
It-tlett irġiel qegħdin jinżammu arrestati fil-lock-up tal-Pulizija fil-Kwartieri Ġenerali, il-Furjana u mistennija jitressqu l-Qorti fil-jiem li ġejjin.
