Anzjan ta’ 88 sena residenti San Ġwann weġġa’ gravi wara li kien involut f’inċident tat-traffiku fl-Imsida.
L-inċident seħħ it-Tnejn għall-ħabta tal-10:00am fi Triq D’Argens.
Mill-ewwel stħarriġ tal-Pulizija rriżulta li l-anzjan intlaqat minn mutur misjuq minn raġel ta’ 38 sena residenti San Ġwann.
Tim mediku mar fil-post sabiex jassisti u ambulanza ħadet lill-anzjan l-Isptar Mater Dei sabiex jingħata l-kura meħtieġa.
Aktar tard ġie ċċertifikat li qed isofri ġrieħi gravi.
L-investigazzjonijiet mill-Pulizija għadhom għaddejjin.
