Wara maratona ta’ 12-il siegħa ta’ ispirazzjoni mill-qalb, it-telethon tal-Fondazzjoni Inspire “Jien Suċċess” irnexxielha tiġbor €329,210 li se jgħinu fil-bini taċ-Ċentru ġdid ta’ Riabilitazzjoni u Benessri li jinsab ġewwa l-kumpless tal-NGO f’Marsaskala.
It-telethon “Jien Suċċess”, bit-tema msejsa fit-twemmin li kull individwu, irrispettivament mil-limitazzjonijiet, il-kundizzjonijiet, jew id-diżabilità, jistħoqqlu l-opportunità li jikseb suċċess u jilħaq il-potenzjal sħiħ tiegħu, intlaqat b’rispons qawwi u mill-qalb kemm min-nies, kif ukoll min-negozji.
“Ninsabu ferħanin u grati għall-appoġġ inkredibbli muri minn individwi, negozji, u komunitajiet madwar Malta u Għawdex,” qal Antonello Gauci, Kap Eżekuttiv tal-Fondazzjoni Inspire. “It-telethon ‘Jien Suċċess’ mhux biss wera s-saħħa tal-għaqda iżda saħħet ukoll l-impenn kondiviż tagħna lejn il-ħolqien ta’ ambjent aktar inklussiv u ta’ appoġġ għal individwi b’diżabilità u għal dawk kollha fil-bżonn tas-servizzi tagħna.”
L-ispiża stmata għall-bini taċ-Ċentru tar-Riabilitazzjoni u l-Benessri mill-aktar avvanzat hi ta’ madwar €400,000, u grazzi għall-ġenerożità tad-donaturi u d-dedikazzjoni tal-voluntiera, sar kontribut sinifikanti għat-twettiq ta’ dan il-proġett ambizzjuż. Iċ-Ċentru tar-Riabilitazzjoni u l-Benessri għandu l-għan li jipprovdi faċilità kompletament aċċessibbli, li fiha ġinnasju ta’ rijabilitazzjoni mfassal għall-bżonnijiet speċifiċi ta’ individwi bi korrimenti newroloġiċi jew limitazzjonijiet fiżiċi. Iċ-ċentru se joffri firxa ta’ servizzi speċjalizzati mmirati lejn it-trawwim ta’ appoġġ emozzjonali, setgħa, u l-benessri ġenerali għall-individwi u l-familji tagħhom.
Matul it-telethon, kienu rrakkuntati stejjer li juru l-impatt tas-servizzi tal-Fondazzjoni Inspire u l-bidliet pożittivi li ġabet fil-ħajja tat-tfal, l-adulti u l-familji. “Is-suċċess ta’ din it-telethon ma jitkejjilx biss f’termini ta’ fondi miġbura,”stqarr Gauci. “Jitkejjel ukoll fit-tama mixgħula, il-ħajja mimsusa, u l-ispirtu ta’ solidarjetà li tkattar.”
Il-Fondazzjoni Inspire esprimiet l-apprezzament tagħha lil dawk kollha li offrew il-ħin u r-riżorsi tagħhom b’mod volontarju kif ukoll l-impjegati tagħhom sabiex jagħmlu t-telethon ta’ suċċess. L-isforzi kollettivi tad-donaturi, il-voluntiera u l-parteċipanti jenfasizzaw il-kapaċità għall-bidla pożittiva meta komunità tingħaqad flimkien.
Għal dawk li tilfu t-telethon ‘Jien Success’ u xorta waħda jixtiequ jikkontribwixxu lejn l-għan tal-Fondazzjoni Inspire jistgħu jagħmlu dan billi jżuru: https://inspire.org.mt/jien-success-2023/
