Neptunes jirkupraw mid-diżappunt tan-knock-out u jagħmluha għall-finali tal-play-offs

Neptunes Videoslots irkupraw mid-diżappunt tan-knock-out meta kif mistenni għelbu lil Valletta Izibet 24-11 u saru l-ewwel tim li se jikkontesta l-finali tal-play-off.

Valletta li b’hekk intemm l-istaġun għalihom, għandhom iħarsu lejh b’sodisfazzjon hekk kif mhux biss irritornaw fil-Kampjonat Premier, iżda kklassifikaw mal-ewwel erbgħa, waslu sas-semifinali tan-knock-out u rebħu t-Tazza Għaqda Ġurnalisti Sports. Valletta ħadu vantaġġ bikri sakemm Neptunes irkupraw u marru 6-2 fil-vantaġġ. Il-Beltin naqqsu d-distakk bin-nofs sakemm Stevie Camilleri kabbar il-vantaġġ għal 7-4.

Neptunes aċċertaw mir-rebħa sa mit-tieni sessjoni bi tripletta ta’ Stevie Camilleri u gowl ta’ ħuh Jordan sa nofs is-sessjoni, bit-tim ta’ Dorian Pisani saħansitra jtemm is-sessjoni 14-5. Valletta rnexxielhom jnaqqsu d-distakk għal 16-9 fit-tielet sessjoni sakemm gowls ta’ Filip Filipovic u Jake Muscat aċċertaw biex Neptunes iżommu l-vantaġġ li bdew is-sessjoni bih. Fl-aħħar sessjoni, Neptunes kellhom l-opportunità li jkabbru d-distakk finali, b’Alec Fenech jispikka b’doppjetta.

Neptunes: A. Borg Cole, J. Muscat (1), S. Gialanze (2), G. Pace (2), M. Castillo (1), J. Bajada (1), S. Camilleri (5), J. Camilleri (2), A. Ivovic (3), F. Filipovic (3), A. Fenech (3), E. Mallia, M. Rossi, D. Bugeja, A. Fava (1)

Valletta: B. Busuttil, J. Spiteri Staines (1), D. Rizzo (1), J. Cassar (2), S. Busuttil, A. Vlahovic (1), D. Paolella (1), I. Nagaev (4), S. Micallef, A. Agius, K. Borg (1), K. Cremona, A. Theuma, M. Demarco, J. Chircop

Referees: Riccardo D’Antoni, Alex de Raffaele

Logħob li jmiss:

Għada:

Kampjonat I Diviżjoni – Play-offs Exiles v Marsaxlokk 6.30pm

Stevie Camilleri ta’ Neptunes jipprova konklużjoni lejn il-lasta ta Valletta (Ritratt: Catriel Farrugia)