Mument emozzjonanti f’San Blas hekk kif il-Pulizija Mariano Bonello, wara diversi xhur, reġa’ ingħaqqad mal-kelb li kien miegħu fis-servizz – il-kelb bl-isem ‘Odin’ li fl-aħħar xhur irtira wara tmien snin ta’ xogħol intensiv fit-taqsima tal-Bomb Disposal Unit tal-Pulizija biex illum il-ġurnata beda ħajja ġdida mar-residenti femminili ta’ San Blas.
Odin, kelb tat-tip Belgian Shepherd, kien ingħaqqad mal-Korp tal-Pulizija fl-2015 meta kellu biss sentejn. U tħarreġ mil-handler tiegħu Mariano Bonello.
“Kelna ħafna searches importanti, bħaċ-CHOGMs, nidħlu postijiet fejn ħadd ma jidħol, bħall-kamra tas-sodda tar-Reġina. Dan il-kelb ra minn kollox. Kelna ħafna summits.”
Issa, Odin beda jgħix ħajja kompletament differenti, kif tispjegalna il-Kap tat-Taqsima tan-Nisa f’San Blas, Deborah Farrugia.
“Odin iqum filgħodu, joħroġ fuq barra imbagħad jimxi kull fejn ikunu r-residenti,” qalet Farrugia. “Ovjament, issa Odin huwa rtirat u allura iktar qed jaqla’ fsied milli xogħol.”
Ħajja sempliċi ferm, iżda li tfisser ħafna għar-residenti.
“Odin ifisser ħafna għar-residenti, ħin kollu jieħdu ħsiebu u joħorġuh magħhom,” qalet Farrugia. “Qed joffrilhom wens kbir u timlilhom il-vojt fil-ħajja tagħhom hawn ġej.”
Il-preżenza ta’ kelb kienet xi ħaġa li ħafna kienu ilhom jistennew.
“Dejjem emmint li annimal jista’ jkun terapewtiku għar-residenti,” qalet Farrugia. “Jgħinhom jirrilassaw billi per eżempju jieħdu ħsieb il-kura tiegħu. Saħansitra qed iqumu iktar kmieni bis-saħħa tiegħu biex imorru mixja. Bla ma jaf, Odin ġab ħafna imħabba u serenità miegħu.”
Din l-intervista li għamilna f’San Blas kienet ta’ opportunità biex Mariano Bonello jerġa’ jiltaqa’ ma’ Odin; mument emozzjonanti ferm għalihom it-tnejn.
“Tgħid forsi mhux se jgħarafni imma kif ġejt qabad u qabeż fuqi, minħabba li kien ilu ma jarani,” qal Bonello. “Aġixxa bħalma jagħmel bniedem, għannaqni u ma riedx jinqala’ minn miegħi.”
U minkejja li jħoss in-nuqqas tiegħu, Mariano Bonello kuntent li Odin qed jgħix ħajja tajba.
“Kuntent li baqa’ jagħti servizz,” qal Bonello. “Servizz mhux bħal qabel imma xorta waħda baqa’ jagħti servizz bħala kelb. Kelb li jaf iħobb u qed jgħin lir-residenti.”
Illum il-ġurnata, Mariano Bonello għandu kelb ieħor tas-servizz, ‘Enzo’ illi għandu sentejn.
“Issa għandi lil Enzo, Springer Spaniel, konna addottajnih,” qal Bonello. “Issa qed nittrenjawh biex eventwalment jieħu post Odin.”
