Illum tibda t-tieni ġurnata tal-kampjonat tas-Serie A fejn ma tispikka l-ebda logħba u fejn l-hekk imsejħa timijiet il-kbar mistennija jiksbu t-tieni rebħa tagħhom.
Forsi l-iktar logħba mistennija hi dik tal-lejla f’San Siro fejn Milan jospitaw lil Torino. Milan għamlu diversi akkwisti dan is-sajf, u neħħew ħafna plejers ukoll u għalhekk Pioli hu msejjaħ għal biċċa xogħol impenjattiva biex jerġa’ jibni skwadra kompettitiva.
Fl-ewwel ħarġa Milan impressjonaw u kisbu tliet punti għand Bologna b’żewġ goals fil-bidu tal-logħba. Illum jibdew favoriti kontra Torino, anke jekk il-Granata dejjem kienu ta’ wġiegħ ta’ ras għar-Rossoneri.
Torino fl-ewwel logħba f’darhom kellhom jikkuntentaw bi draw kontra Cagliari ta’ Claudio Ranieri u llum ikunu bla dubju kuntenti bi draw ieħor.
Iċ-champions Napoli mhux mistennija li jfallu fi Stadio Diego Armando Maradona kontra Sassuolo, l-istess kif mhux mistennija jfallu Juventus f’darhom kontra Bologna.
Kemm Napoli kif ukoll Juventus kellhom prestazzjoni ferm tajba fid-debutt.
Inter għandhom l-iktar logħba impenjattiva f’Sardinja kontra Cagliari, filwaqt li ż-żewġ timijiet tal-kapitali jridu jistejqru wara li kellhom debutt ferm negattiv.
Roma, li fl-ewwel logħba kienu miżmuma minn Salernitana, illejla jkun fil-Bentegodi kontra Hellas Verona, filwaqt li Lazio, li tilfu l-ewwel logħba kontra Lecce, ikunu fl-Olimpico kontra Genoa, fejn il-Grifoni kellhom ritorn diżastruż fis-Serie A fejn dabbru ħamsa kontra Fiorentina.
Il-Vjola fost il-ġimgħa tilfu kontra Rapid Vienna fil-Conference League u għada jospitaw lil Lecce.
Illum
18:30 Frosinone v Atalanta
18:30 Monza v Empoli
20:45 Milan v Torino
20:45 Verona v Roma
Għada
18:30 Fiorentina v Lecce
18:30 Juventus v Bologna
20:45 Lazio v Genoa
20:45 Napoli v Sassuolo
It-Tnejn
18:30 Salernitana v Udinese
20:45 Cagliari v Inter
