Floriana Ajax Premier CC huma r-rebbieħa tal-Kampjonat tas-Sajf organizzat mill-Malta Darts Association . F’finali missielta huma għelbu lil Fgura Darts Club fill-ħin barrani wara li sa tmiem il-partita l-iskor kien dak ta’ 3-3.
Finali bbilancjata bejn żewġ timijiet li kellhom fi ħdanhom numru ta’ plejers stabbiliti li għenu biex il-konfront ikun wieħed eċcitanti. Iċ-champions tax-xitwa Floriana dejjem kienu fil-vantaġġ iżda Fgura dejjem wettqu reazzjoni biex jagħmlu l-iskor indaqs sakemm il-partita kellha tmur għall-ħin barrani jew kif inhu magħruf bil-logħba tal-1001.
Is-sitt plejers ta’Floriana Ajax Premier kienu aktar preċiżi fit-tefgħat tagħhom fejn kisbu distakk tajjeb meta rnexxielhom jagħlqu qabel Fgura Darts Club. Fi tmiem il-finali li damet għal iktar minn tliet sigħat u nofs, il-president tal-Malta Darts Association Roderick Zammit ippreżenta t-trofew lill-plejer ta’ Floriana Ajax Premier CC Jonathan Aquilina.
