Neptunes se jkollhom bidla fit-tmexxija teknika hekk kif Dorian Pisani tefa’ r-riżenja tiegħu bħala kowċ tat-tim. Neptunes ġejjin minn sena diżappuntanti li fiha ma rnexxielhomx jirbħu unur. Matul dan is-sajf, Neptunes kienu eliminati fis-semifinali tan-knock-out filwaqt li tilfu s-serje ta’ finali b’żewġ telfiet kontra San Ġiljan. Dan fisser li Neptunes ma rebħux unur għat-tieni sena konsekuttiva.
Fi stqarrija, Neptunes irringrazzjaw lil Pisani tal-ħidma, id-dedikazzjoni, l-impenn, l-integrità u l-onestà tiegħu lejn il-klabb filwaqt li awgurawlu għall-futur. Neptunes mistennija jħabbru l-kowċ il-ġdid fil-jiem li ġejjin u mhux eskluż li jħarsu lejn soluzzjoni interna.
Pisani daħal fit-tmexxija teknika fl-aħħar ta’ Lulju tas-sena l-oħra f’mument kruċjali u mexxa lit-tim fl-aħħar mumenti tal-istaġun li għadda u tul din is-sena. Hu kien ġej minn suċċess ma’ Marsaskala fl-Ewwel Diviżjoni fl-2019 u ma’ San Ġiljan fil-Kampjonat Premier bejn l-2020 u l-2022 qabel kien irriżenja f’April tas-sena l-oħra.
