It-tieni raġel ġie mixli b’rabta ma’ attakk ta’ ħruq fuq jott irmiġġat fix-xatt ta’ Tas-Sliema f’Awwissu tas-sena li għaddiet. Olivend Xuereb ta’ 38 sena minn San Pawl il-Baħar kien akkużat b’kompliċità fit-tħejjija u l-eżekuzzjoni tal-attakk tal-ħruq fuq il-jott Megan Valletta, kif ukoll li ta xhieda falza fil-prosekuzzjoni parallela ta’ raġel ieħor akkużat fuq in-nirien, Wayne Delia. Ġie mixli wkoll li sar reċidiv.
L-Ispettur tal-Pulizija tas-CID Jeffrey Scicluna qal lill-maġistrat Kevan Azzopardi li kien investiga rapport ta’ ħruq ta’ dgħajsa fuq nar li kien viżibbli mill-front ta’ ta’ Tas-Sliema. Is-CID flimkien ma’ uffiċjali tad-distrett u rkuprat filmati tas-CCTV li wrew żewġ individwi fil-viċinanzi tad-dgħajsa jaġixxu b’mod suspettuż.
L-investigazzjoni wasslet għall-arrest ta’ Wayne Delia kif ukoll ta’ Xuereb, li eventwalment kellhom jinħelsu mingħajr akkuża minħabba li ma kienx hemm biżżejjed provi dak iż-żmien. Waqt ix-xhieda tiegħu waqt il-kumpilazzjoni tal-provi fil-konfront tiegħu, Delia qal lill-Qorti li Xuereb kien ipparteċipa fir-reat billi tefa’ jerry can fuel fuq id-dgħajsa, filwaqt li Delia kien tefa’ ballun materjal li kien qed jaqbad.
Xuereb, li qal lill-Qorti li kien jaħdem fil-manutenzjoni tal-lukandi u bħala gwardjan tas-sigurtà part-time, wieġeb mhux ħati. L-Avukat Sarah Tua talbet il-ħelsien mill-arrest għall-imputat, filwaqt li argumentat li l-investigazzjoni kienet diġà kompluta u x-xhieda prinċipali kienet diġà ppreservata fl-inkjesta.
L-imputat għandu tliet impjiegi u ftit li xejn għandu ċans li jaħrab, sostniet l-avukat, filwaqt li żiedet li l-kondotta kriminali tiegħu, għalkemm mhux bla tebgħa, ilu ma tara żieda magħha għal tal-inqas dawn l-aħħar tmien snin.
L-avukat tal-prosekuzzjoni Joseph Camilleri Azarov mill-AĠ oġġezzjona għat-talba għall-ħelsien mill-arrest, billi kkwota l-gravità tar-reati, kif ukoll il-fatt li x-xhieda tal-allegat kompliċi tiegħu kellha tiġi rreġistrata f’dawn il-proċeduri.
Kien hemm riskju reali li seta’ javviċina lit-tfajla ta’ Delia, sostniet il-prosekuzzjoni, filwaqt li żiedet li l-kondotta kriminali ta’ Xuereb ma tantx tawgura li kien se joqhħod mal-kundizzjonijiet tal-libertà proviżorja.
Il-qorti, wara li semgħet sottomissjonijiet fuq pleġġ, innutat li r-rekord kriminali tal-imputat wera li dan ma kienx l-ewwel darba li kiser dufrejh mal-liġi. “Għalkemm l-aħħar ksur tiegħu seħħ kważi 10 snin ilu, jidher li l-imputat warrab l-opportunità ta’ riforma u sab ruħu l-qorti, għal darb’oħra jwieġeb għall-akkużi, li din id-darba huma pjuttost serji.”
Barra minn hekk, ix-xhud prinċipali f’dan il-każ kien għadu ma xehedx, qal il-maġistrat, li qal li ma kienx konvint li l-imputat se jobdi kwalunkwe kundizzjoni ta’ libertà proviżorja li jista’ jimponi f’dan l-istadju bikri tal-proċeduri. Il-libertà proviżorja għalhekk ġiet rifjutata.
