Nhar it-Tnejn, 4 ta’ Settembru fin-Naxxar, ser jilħqu l-qofol tagħhom iċ-ċelebrazzjonijiet tal-25 anniversarju mit-twaqqif tal-Kummissjoni Żgħażagħ fi ħdan l-Għaqda Mużikali Maria Bambina Banda Vittorja tan-Naxxar.
Iċ-ċelebrazzjonijiet jibdew b’marċ brijuż mill-Banda Vittorja fit-8:00pm, li jilħaq il-milja tiegħu fil-pjazza fost il-briju taż-żgħażagħ Naxxarin għal ħabta tal-10:30pm. Wara l-marċ ser jintwera feature mħejji għal din l-okkażżjoni, li ser juri l-ħidma u d-determinazzjoni ta’ dawn iż-żgħażagħ ħabrieka.
Wara ikun hemm ħruq ta’ nar tal-art tradizzjonali, bis-serata tispiċċa b’xow kbir tan-nar u dawl sinkronizzati mal-mużika, bl-isem ta’ “The Victory Pyro Musical Show”. Din ser tkun is-6 darba li qed jinħaraq dan ix-xow, b’din id-darba ikun fuq skala ferm ikbar.
Żgur li kull dilettant tal-festi u tal-piroteknika Maltija għandu jagħmel mezz sabiex jattendi għal dawn iċ-ċelebrazzjonijiet.
