L-aktar trasferimenti li spikkaw dan is-sajf

L-attakkant Internazzjonali Arġentin Lionel Messi, meqjus bħala wieħed mill-aħjar jekk mhux l-aħjar plejer fid-dinja, ħalla l-Ewropa wara karriera ta’ 20 sena fejn fiha lagħab ma’ Barcelona u ma’ PSG. Is-seba’ darbiet rebbieħ tal-Balon d’Or ħalla lil PSG f’dan is-suq sabiex ingħaqad ma’ Inter Miami fil-Major League Soccer, fl-Istati Uniti. Il-captain tat-tim Nazzjonali Arġentin, li rebaħ l-aħħar edizzjoni tat-Tazza tad-Dinja, kellu bidu tajjeb fl-Istati Uniti, hekk kif f’10 logħbiet huwa sab ix-xibka 11-il darba, kif ukoll ta 3 assists.

2. NEYMAR – €90 MILJUN

Stilla oħra li ħalla lil PSG dan is-sajf kien l-attakkant Brażiljan Neymar.  Transferiment żgur mhux mistenni hekk kif ħafna ħasbu li dan il-plejer kien se jkollu karriera differenti ħafna minn dik li kellu, madankollu numru ta’ injuries serji kienu ta’ detriment kbir għall-karriera tiegħu. Is-somma mħallsa għat-transferiment ta’ Neymar ma’ PSG minn ma’ Barcelona fl-2017 għada meqjusa bħala l-ikbar somma li tħallset għal plejer fl-istorja tal-futbol, bis-somma globali tkun ta’ €222 miljun. Il-plejer ta’ 31 sena ffirma ma’ Al-Ahli fl-Arabija Sawdija għas-somma ta’ €90 miljun.

3. HARRY KANE – €100 MILJUN

Wara 14-il sena ma Tottenham Hotspur, Harry Kane ingħaqad maċ-champions tal-Ġermanja Bayern Munich, bit-tir li jirbaħ l-ewwel tazza fil-karriera tiegħu. Minkejja r-rekord impressjonanti ta’ gowls skorjati li għandu dan il-plejer, anka fil-livell Internazzjonali mal-Ingilterra fejn huwa meqjus l-aqwa skorer ta’ kull żmien bi 58 gowl, Kane qatt ma kellu l-unur li jirbaħ tazza jew kompetizzjoni. Huwa ġie viċin f’numru ta’ okkażjonijiet, bl-iktar memorrabli jkunu t-telfa fil-finali tal-UEFA Champions League fl-2019 kontra Liverpool, kif ukoll it-telfa fil-finali fil-EURO 2020 ma’ pajjiżu kontra l-Italja. Fl-ewwel żewġ logħbiet tiegħu fil-Bundesliga kane skorja 3 gowls.

4. JUDE BELLINGHAM – €103 MILJUNI

Wieħed mill-iktar plejers segwiti fid-dinja, il-plejer ta’ 20 sena Jude Bellingham għamel il-pass evidenti li kien immiss u ngħaqad ma’ Real Madrid għas-somma ta’ €103 miljuni. Bellingham, li f’qasir żmien stabilixxa ruħu bħala wieħed mill-aħjar plejers fid-dinja, wara tlett snin ma’ Borussia Dortmund, iddeċieda li jingħaqad ma’ Los Blancos, l-iktar tim li rebaħ UEFA Champions Leagues fl-istorja, b’total ta’ 14.

5. DECLAN RICE – €122 MILJUN

Wara d-diżappunt li sofrew Arsenal l-istaġun li għadda bit-telf tal-Premier League fl-aħħar ġranet tal-kampjonat, il-Gunners għamlu minn kollox fis-suq tat-transferimenti sabiex isaħħu l-iskwadra, u hekk għamlu bl-akkwist tal-midfielder Ingliż Declan Rice mingħand West Ham, bis-somma ta’ €122 miljun imħallsa għal Rice tkun l-iktar somma għolja mħallsa għal plejer Ingliż.

6. MOISES CAICEDO – €116-IL MILJUN

€116-il miljun hija l-ikbar somma mħallsa f’dan is-suq tat-transferimenti għal kwalunkwe plejer fl-Ewropa. Il-midfielder Moises Caicedo ħalla lil Brighton wara biss żewġ staġuni mas-Seagulls sabiex ingħaqad ma’ Chelsea biex issir wieħed minn ħafna plejers transferiti lejn Stamford Bridge din is-sena, bit-tama li l-Blues ikollhom staġun aħjar minn dak preċedenti.

7. KARIM BENZEMA – BLA KUNTRATT

Ir-rebbieħ tal-aħħar edizzjoni tal-Balon d’Or Karim Benzema huwa plejer ieħor li ħalla l-Ewropa sabiex ikompli l-avventura tiegħu f’kontinent ieħor, fl-Arabija Sawdija. Benzema ffirma ma’ Al-Ittihad mingħand Real Madrid f’Ġunju li għadda f’wieħed mill-ewwel transferimenti f’dan is-suq fost il-ħafna f’dan il-kampjonat.

8. JOSKO GVARDIOL – €90.5 MILJUNI

Id-difensur internazzjonali Kroat ta’ 21 sena huwa wieħed mill-aħjar difensuri fl-Ewropa ta’ l-età tiegħu, u wara taqtigħa bejn bosta klabbs għal dan il-plejer, kienu ċ-champions tal-Ingilterra li rnexxielhom jakkwistawh u jikkonfermaw is-servizzi tiegħu sal-2028. Il-prezz ta’ €90.5 miljuni li s-Citizens ħallsu għal Gvardiol mingħand RB Leipzing jitfa’ lil plejer fit-tieni post fil-klassifika tal-ikbar somom imħallsa għal difensuri, b’Harry Maguire ta’ Manchester United jokkupa l-ewwel post meta ngħaqad mar-Red Devils lura fl-2019 għas-somma ta’ €94 miljun.

9. SANDRO TONALI – €70 MILJUN

Transferiment importanti għal Newcastle United fil-mixja tagħhom lejn iktar suċċessi, anka bil-parteċipazzjoni tagħhom fil-UEFA Champions League din is-sena wara nuqqas ta’ 20 sena. Tonali ħalla lil Milan wara tlett staġuni sabiex ingħaqad mal-Magpies għall-ewwel avventura tiegħu barra minn pajjiżu, bil-midfielder Internazzjonali Taljan diġa jagħmel l-impatt tiegħu mat-tim u jisb ix-xibka fid-debutt tiegħu kontra Aston Villa.

10. OUSMANE DEMBELE – €58 MILJUN

L-ex attakkant laterali ta’ Barcelona u Borussia Dortmund Ousmane Dembele mexa fuq il-passi ta’ Lionel Messi u Neymar sabiex ingħaqad maċ-champions ta’ Franza minn ma’ Barcelona, fejn issa huwa mistenni jkun il-talisman il-ġdid tal-Les Parisiens wara li dawn iż-żewġ plejers ħallew lil-klabb fl-aħħar xhur. Din hija l-ewwel darba li Dembele rritorna lura f’pajjiżu wara li ħalla lil Rennes lura fl-2016.

11. ROMELU LUKAKU – B’SELF

L-attakkant internazzjonali Belġjan huwa magħruf bħala wieħed mill-aktar karattri interessanti fuq il-midja soċjali, speċjalment minħabba n-numru ta’ intervisti li kellu fejn kemm il-darba stqarr li minn dejjem kienet ix-xewqa tiegħu li jilgħab mat-tim li ngħaqad miegħu. Fatt interessanti huwa li Romelu Lukaku huwa l-plejer li fil-karriera tiegħu l-iktar li akkumula somon tat-transferimenti, b’total ta’ kważi €340 miljun. Lukaku rritorna lura fil-kampjonat Taljan, b’din id-darba jerġa’ jkun taħt it-tmexxija ta’ Mourinho ma’ Roma b’self mingħand Chelsea.

12. ANDRE ONANA – €56 MILJUN

Minn perspettiva ta’ finanzi, dan it-transferiment kien wieħed għaqli għal Inter hekk kif din is-somma kienet kollha ta’ profitt għan-Nerazzuri wara li Onana ngħaqad ma’ Inter b’xejn l-istaġun li għadda. F’termini ta’ futbol, akkwist tajjeb ħafna għal Manchester United, hekk kif wara t-tluq ta’ David De Gea, huma rnexxielhom jakkwistaw wieħed mill-aħjar goalkeepers fl-Ewropa, sew fl-abiltà li għandu bejn il-lasti kif ukoll b’saqajħ, fattur importanti fil-futbol modern.

13. KIM MIN JAE – €59 MILJUN

Telfa kbira għaċ-champions tal-Italja Napoli hekk kif id-difensur mill-Korea t’Isfel Kim Min Jae ingħaqad ma’ Bayern Munich sabiex ikompli jsaħħaħ id-difiża tagħhom. L-akkwist jasal wara t-telfa li sofrew Bayern Munich kontra Manchester City fil-kwarti finali tal-UEFA Champions League, fejn ħafna analisti gergru fuq l-organizzazzjoni tad-difiża Ġermaniża u kemm kienet faċli għas-Citizens li jikkapitalizzaw fuq l-iżbalji banali tad-difensuri. Kim kien strumentali fis-suċċess ta’ Napoli l-istaġun li għadda u għandu jkun ta’ suċċess anka ma’ Bayern Munich għal ħafna snin li ġejjin.

14. SADIO MANE – €47 MILJUN

Wara avventura mhux daqshekk feliċi fil-Ġermanja ma’ Bayern Munich, fejn kellu sena mimlija b’kunflitti ma’ ħafna mill-plejers u mal-kowċ, l-attakkant ta’ 31 sena Sadio Mane ħalla lil klabb sabiex ingħaqad ma’ Al-Nassr fl-Arabija Sawdija. Akkwist tajjeb għal Al Nassr, speċjalment fl-għażliet tal-attakkanti hekk kif Mane qiegħed jingħaqad ma’ skwadra li diġa għanda attakkanti bħal Cristiano Ronaldo u Talisca.

15. ARDA GULER – €24 MILJUN

Akkwist ta’ żagħżugħ b’talent kbir ieħor għal Real Madrid huwa dak tal-midfielder ta’ 18-il sena Arda Guler mingħand Fenerbache. Guler huwa wieħed mill-aktar plejers segwiti fid-dinja, u kienu Los Blancos li fl-aħħar irnexxielhom jakkwistaw il-firma tiegħu wara li ħalsu l-klwasola li kellu fil-kuntratt li jħalli l-plejer jitlaq jekk ikun hemm klabb iħallas €24 miljun għas-servizzi tiegħu. Los Blancos komplew ir-riġenerazzjoni tal-iskwadra b’dan l-akkwist, bi plejers oħra ta’ età żgħira bħal Vinicius Junior, Rodrygo, Bellingham, Valverde, Camavinga u Tchouameni diġa jagħmlu parti mill-iskwadra.

(Ritratti: EPA)