Raġel ammetta li ta daqqa ta’ ras u beżaq fuq uffiċjali tal-pulizija f’Paceville, fis-sigħat bikrin tal-Ħadd filgħodu. L-Ispettur Brian Xuereb ressaq il-Qorti lil Agrippino Felice ta’ 48 sena mill-Gżira quddiem il-Maġistrat Claire Stafrace Zammit, akkużat li aggredixxa tliet uffiċjali tal-pulizija, li insulenta, hedded jew li wettaq reat fuqhom waqt li kienu qed jaqdu dmirijiethom, li weġġa’ ħafif kuntistabbli tal-pulizija, li kiser il-paċi, li kien fis-sakra u li ma kienx kapaċi jieħu ħsieb lilu nnifsu f’post pubbliku u li ma jobdix ordnijiet leġittimi tal-pulizija.
Fil-Qorti ngħad li r-raġel kien mar f’bar f’Paceville ma’ ibnu. Felice ma ħax pjaċir meta ibnu ġie avviċinat mill-pulizija dwar kwistjoni mhux relatata u beda jqaħqaħa mal-uffiċjali. Huwa kien ingħata struzzjonijiet biex joqgħod bilqiegħda, u wara t-tifel kien qallu biex jitlaq mill-bar.
Fit-triq barra l-bar, ir-raġel kien ta daqqa ta’ ras lil uffiċjal tal-pulizija u beżaq fuq il-kollegi tal-uffiċjal meta ppruvaw irażżnuh. Waqt li kien iddaħħal f’karozza tal-pulizija, Felice kien ukoll ta daqqa ta’ sieq fuq wiċċ uffiċjal.
L-inċident kien inqabad fuq il-body cams tal-uffiċjali tal-pulizija. Felice wieġeb ħati tal-akkużi. Waqt li kien qed jagħmel sottomissjonijiet dwar il-piena, l-avukat difensur Alfred Abela qal lill-Qorti li Felice kien għaddej minn żmien diffiċli, hekk kif martu kienet qed tingħata l-kura għal kundizzjoni medika mhux żvelata.
Filwaqt li nnutat l-ammissjoni bikrija tal-ħtija ta’ Felice u l-fatt li l-piena għall-akkużi l-inqas ġiet assorbita f’dawk l-aktar serji, il-Qorti kkundannat lir-raġel għal 18-il xahar ħabs, sospiżi għal sentejn u mmultatu €4,000.
Inħarġet ukoll ordni ta’ trażżin ta’ sentejn favur l-uffiċjali li kien aggredixxa. Il-Qorti wissiet lil Felice li jekk jikser l-ordni ta’ trażżin ikun jeħel multa addizzjonali ta’ €7,000 jew sa sentejn ħabs, jew kemm multa kif ukoll priġunerija.
