Għat-tieni darba fl-istorja tar-Regatta ta’ Jum il-Vitorja, ix-Shield intrebħet minn żewġ distretti. Fl-2013 ħadu x-Shield sitt xhur kull wieħed Marsa u Bormla u għaxar snin wara kien imiss il-Birgu u Bormla wara li t-tnejn spiċċaw b’56 punt.

Ir-rebħ tax-Shield għandu sinifikat differenti għaż-żewġ rebbieħa. Għal Birgu dan hu t-tieni suċċess fl-istorja wara nuqqas ta’ 39 sena filwaqt li Bormla issa jinsabu b’total ta’ 22 rebħa u jinsabu biss rebħa bogħod milli jirbħu r-rekord tal-Isla. Ix-Shield għall-ewwel sitt xhur se tkun għand il-Birgu minħabba li kellhom aktar paljijiet minn Bormla.

F’Kategorija B, Bormla reġgħet ħarġet rebbieħa wara s-suċċess tas-sena l-oħra kif ukoll fir-Regatta ta’ Marzu li għadda u tas-sena l-oħra. Il-Kalkara kklassifikaw fit-tieni post u baqgħu b’ċans sal-aħħar tellieqa.

Il-11-il tellieqa fil-programm li saru fil-Port il-Kbir, saru f’kundizzjonijiet mhux faċli minħabba s-sitwazzjoni diffiċli tar-riħ fuq il-baħar. Ir-rimi beda jkun ta’ ostaklu speċjalment għad-dgħajjes li kienu fuq in-naħa ta’ barra tal-Port. Is-sit netnews.com.mt. aġġornakom wara kull tellieqa li saret illum waranofsinhar.

L-aħħar metri kienu deċiżivi għar-riżultat finali

L-ewwel tellieqa ta’ Kategorija A offriet emozzjonijiet rari hekk kif diversi dgħajjes spiċċaw għerqu kawża tal-ilma sostanzjali li daħlu fid-dgħajjes Tal-Midalji. Rebbieħa spiċċaw Bormla b’distakk minimu fuq il-Birgu, biż-żewġ dgħajjes jinżlu taħt l-ilma wara tmiem it-tellieqa.

Marsamxett b’pass kajman irnexxielhom jispiċċaw fit-tielet post. Id-dgħajjes tal-Marsa u tal-Isla ma spiċċawx it-tellieqa minħabba li għerqet id-dgħajsa. L-ekwipaġġ rebbieħ kien magħmul minn Maximilian Mamo, Clive Casha, Dennis Thornton, Romario Brignone.

Fit-tellieqa bil-Frejgatini, id-dgħajjes ta’ Bormla u l-Isla ma spiċċawx it-tellieqa. Owden Caruana Smith u Cayvon Gatt ħadu vantaġġ u taw 12-il punt lill-Marsin. Fl-aħħar metri, il-Kalkara qabżet lid-dgħajsa tal-Birgu.

Mument determinanti seħħ f’Tal-Pass ta’ bit-Tnejn. F’sitt minuti u 25 sekonda, il-koppja Clyde Cutajar u Clayton Darmanin tal-Birgu rebħu t-tellieqa b’qadfa fenomenali lejn it-tmiem. Din ir-rebħa mhux biss kienet importanti għall-Ġirbin iżda waqqfet is-sensiela rekord ta’ 20 rebħa konsekuttiva li kisbu Clive Casha u Dennis Thornton meta kienu ma’ Marsa u ma’ Bormla.

Il-Birgu kkonsolidaw il-vantaġġ bit-tieni palju tal-ewwel permezz ta’ Christian Camilleri u Nigel Sant fil-Kajjikki. Dawn iż-żewġ qaddiefa rebħu sena ilu mal-Isla u rrepetew dan is-suċċess iżda mal-Birgu f’ħin ta’ seba’ minuti u erba’ sekondi. Iż-żewġ qaddiefa kellhom qadfa konsistenti u għelbu l-isfida tal-qaddiefa Maximilian Mamo u Romario Brignone ta’ Bormla.

Qabel l-aħħar tellieqa Tal-Pass b’Erbgħa, il-Birgu kellhom vantaġġ ta’ tmien punti fuq Bormla. Huma riedu biss jispiċċaw qabel l-avversarji biex jaċċertaw mir-rebħa finali.

Din dejjem tkun tellieqa missielta u għal sena oħra reġgħet ma ddiżappuntatx. L-uniku sodisfazzjon fil-ġurnata għas-Sengleani b’rebħa permezz tal-qaddiefa Redeemer Rapa, Glenn Zammit, Russell Bugeja u Andre Gauci. Fi tmiem eċċitanti, Bormla daħlet it-tieni qabel il-Birgu li rnexxielhom isalvaw it-tielet post għal ftit. B’hekk Bormla rkupraw it-tmien punti żvantaġġ u t-tnejn spiċċaw b’56 punt.

Klassifika Finali: Birgu 56 punt, Bormla 56 punt, Isla 28 punt, Marsa 12-il punt, Marsamxett 12-il punt, Kalkara 8 punti

Bormla jxejnu l-isfida tal-Kalkara f’Kategorija B

Il-Bormliżi rebħu erbgħa minn ħamsa tlielaq f’Kategorija B u spiċċaw b’total ta’ 80 punt. Huma għelbu l-isfida tal-Kalkara li kienu l-aktar sfidanti denji fil-kategorija.

Kienu l-Kalkara li permezz ta’ Gilmore u Godwin Buttigieg rebħu t-tellieqa Tal-Pass b’żewġ imqadef b’vantaġġ sostanzjali. Bormla rkupraw bir-rebħ fit-tellieqa fil-Kajjikki, bil-koppja Mel Magro u Damien Attard jaqdfu tajjeb lejn l-aħħar fuq in-naħa ta’ ġewwa. Sa dak il-ħin, Bormla u l-Kalkara kienu jinsabu b’24 punt.

Qadfa konsistenti ta’ Matthia Calleja, Charvon Gatt, Cleaven Falzon u Denzel Thornton fuq id-dgħajsa Tal-Midalji tat 20 punt ieħor lid-distrett ta’ Bormla. Id-distakk kompla jikber hekk kif il-Bormliżi rebħu wkoll it-tellieqa bil-Frejgatini.

Il-koppja Mel Magro u Matthia Calleja rebħu b’vantaġġ tajjeb u f’ħin ta’ seba’ minuti u 38 sekonda u kważi kienu ċerti mir-rebħ tax-Shield sakemm il-Kalkara daħlet it-tieni fl-aħħar ħin qabel Birżebbuġa u żammew it-tamiet remoti sal-aħħar tellieqa.

Madankollu fl-aħħar tellieqa dik Tal-Pass b’Erbgħa, Bormla mhux biss spiċċat qabel il-Kalkara iżda rebħet it-tellieqa f’sitt minuti u 12-il sekonda b’vantaġġ minimu fuq il-Kalkara u l-Birgu. L-ekwipaġġ rebbieħ kien magħmul minn Mel Magro, Charvon Gatt, Cleaven Falzon, Damien Attard.

Klassifika Finali: Bormla 80 punt, Kalkara 48 punt, Birżebbuġa 24 punt, Birgu 14-il punt, Marsamxett 6 punti

Il-Birgu b’rebħa oħra fit-tellieqa tan-nisa

Ikompli d-dominju tal-Birgu fit-tellieqa tal-Frejgatini tan-nisa. Il-koppja Shazel Grima u Glynnis Mizzi kellhom qadfa konsistenti u rebħu mingħajr diffikultà fi tmien minuti u erba’ sekondi.

Din it-tellieqa li kienet l-ewwel waħda fil-programm, uriet id-diffikultajiet li kien se jkollhom il-qaddiefa minħabba l-kundizzjonijiet tal-baħar. Għall-Ġirbin din hi s-seba’ rebħa konsekuttiva f’din it-tellieqa, sensiela li ilha li bdiet mill-2019.

Riżultat – 1. Birgu, 2. Bormla, 3. Birżebbuġa

Ir-Riżultati tat-tlielaq kollha

Tellieqa tan-nisa

Riżultat – 1. Birgu, 2. Bormla, 3. Birżebbuġa

Ekwipaġġ rebbieħ – Shazel Grima, Glynnis Mizzi

L-ewwel tellieqa – Kategorija B – Tal-Pass b’żewġ imqadef

Riżultat – 1. Kalkara 20 punt, 2. Bormla 12-il punt, 3. Marsamxett 6 punti

Ekwipaġġ rebbieħ – Gilmore Buttigieg, Godwin Buttigieg

It-tieni tellieqa – Kategorija A – Tal-Midalji

Riżultat – 1. Bormla 20 punt, 2. Birgu 12-il punt, 3. Marsamxett 6 punti

Ekwipaġġ rebbieħ – Maximilian Mamo, Clive Casha, Dennis Thornton, Romario Brignone

It-tielet tellieqa – Kategorija B – Kajjikki

Riżultat – 1. Bormla 12-il punt, 2. Birżebbuġa 8 punti, 3. Kalkara 4 punti

Ekwipaġġ rebbieħ – Mel Magro, Damien Attard

Ir-raba’ tellieqa – Kategorija A – Frejgatini

Riżultat – 1. Marsa 12-il punt, 2. Kalkara 8 punti, 3. Birgu 4 punti

Ekwipaġġ rebbieħ – Owden Caruana Smith, Cayvon Gatt

Il-ħames tellieqa – Kategorija B – Tal-Midalji

Riżultat – 1. Bormla 20 punt, 2. Birżebbuġa 12-il punt, 3. Birgu 6 punti

Ekwipaġġ rebbieħ – Matthia Calleja, Charvon Gatt, Cleaven Falzon, Denzel Thornton

Is-sitt tellieqa – Kategorija A – Tal-Pass ta’ bit-Tnejn

Riżultat – 1. Birgu 20 punt, 2. Bormla 12-il punt, 3. Marsamxett 6 punti

Ekwipaġġ rebbieħ – Clyde Cutajar, Clayton Darmanin

Is-seba’ tellieqa – Kategorija B – Frejgatini

Riżultat – 1. Bormla 12-il punt, 2. Kalkara 8 punti, 3. Birżebbuġa 4 punti

Ekwipaġġ rebbieħ – Mel Magro, Matthia Calleja

It-tmien tellieqa – Kategorija A – Kajjikki

Riżultat – 1. Birgu 12-il punt, 2. Bormla 8 punti, 3. Isla 4 punti

Ekwipaġġ rebbieħ – Christian Camilleri, Nigel Sant

Id-disa’ tellieqa – Kategorija B – Tal-Pass b’Erbgħa

Riżultat – 1. Bormla 24 punt, 2. Kalkara 16-il punt, 3. Birgu 8 punti

Ekwipaġġ rebbieħ – Mel Magro, Charvon Gatt, Cleaven Falzon, Damien Attard

L-għaxar tellieqa – Kategorija A – Tal-Pass b’Erbgħa

Riżultat – 1. Isla 24 punt, 2. Bormla 16-il punt, 3. Birgu 8 punti

Ekwipaġġ rebbieħ – Redeemer Rapa, Glenn Zammit, Russell Bugeja, Andre Gauci

Ir-rebbieħa tar-Regatta ta’ Jum il-Vitorja:

Senglea – 23

Bormla – 22

Marsa – 14

Kalkara – 7

Marsamxett – 2

Birgu – 2

Ir-rebbieħa tax-Shield fl-aħħar 10 snin

2014 – Marsa

2015 – Marsa

2016 – Marsa

2017 – Bormla

2018 – Bormla

2019 – Bormla

2020 – Marsa

2021 – ma saritx

2022 – Bormla

2023 – Birgu/Bormla