Il-Ġermanja rebħu l-ewwel Tazza tad-Dinja tal-basketball fl-istorja meta fil-finali għelbu lis-Serbja 83-77. Din kienet l-aħjar prestazzjoni tat-tim Ġermaniż fit-Tazza tad-Dinja sa mill-2002 meta dakinhar f’Indianapolis temmew fit-tielet post.
It-tim Ġermaniż sar il-ħames rebbieħ konsekuttiv li fit-triq għall-finali ma tilef l-ebda partita. Dennis Schroder kien il-protagonista għat-tim ta’ Gordon Herbert meta skorja 28 punt filwaqt li Franz Wagner skorja 19-il punt ieħor. Minn naħa l-oħra, għas-Serbja, Aleksa Avramovic skorja 21 punt filwaqt li Bogdan Bogdanovic skorja 17-il punt ieħor.
Matul it-triq għall-finali it-tim Ġermaniż wera li kellu pjan biex jirbaħ din it-Tazza tad-Dinja meta fost l-oħrajn fis-semifinali għeleb lill-Istati Uniti. Intant fil-partita għat-tielet u r-raba’ post kienu l-Kanada li ħarġu rebbieħa u kisbu l-midalja tal-bronż meta għelbu lill-Istati Uniti 127-118.
