Turist li ġie fl-idejn ma’ uffiċjal tas-sigurtà fi strip club ġewwa Paceville wara li lmenta li kienu qarrqu bih, ingħata sentenza sospiża wara li wieġeb ħati ta’ akkużi relatati. L-Ispettur Keith Xerri ressaq il-qorti lil Ben Mawdsley, Ingliż ta’ 35 sena minn Leeds, quddiem il-maġistrat Donatella Frendo Dimech u akkużah li pprova jisraq żewġ fliexken Bourbon mill-White Palace Gentlemen’s Club f’Paceville, hedded u weġġa’ ħafif pulizija, u li ma jobdix l-ordnijiet leġittimi tiegħu u kiser il-paċi pubblika.
Waqt li kien fl-iżbarra, b’għajnejh il-leminija minfuħa l-akkużat deher li kien involut fi ġlieda. L-avukat tal-għajnuna legali tiegħu Leontine Calleja infurmat lill-Qorti li r-raġel kien qed iwieġeb ħati tal-akkużi,li wassal lill-maġistrat biex tfakkru li jista’ jintbagħat il-ħabs.
F’dak il-punt, Mawdsley staqsa lill-qorti x’kienu l-akkużi. Wara li nfurmat lir-raġel dwar xhiex kien akkużat, il-Qorti ssospendiet is-seduta għal żmien qasir biex tagħtih żmien biex jerġa’ jikkonsulta mal-avukat tiegħu. L-imputat iżda xorta tenna li huwa ħati.
L-Ispettur Xerri qal lill-qorti li Mawdsley kien fis-sakra fil-Gentleman’s Club u ma kienx “sodisfatt bis-servizz.” Waqt li ħass li kien qed jiġi ngannat mill-hostesses, ir-raġel kien ilmenta mal-management, li ma kinux simpatiċi miegħu, u għalhekk ħa żewġ fliexken Jack Daniels u pprova joħroġ mill-post.
Ir-raġel twaqqaf minn bouncers, li ċemplu lill-pulizija. Kien hawn li nqalgħet taqbida li fiha Mawdsley gidem widna ta’ pulizija. “Kien barra filgħaxija biex jieħu pjaċir,” spjegat Dr. Calleja. “Ġie ffrodat fil-Gentlemen’s club, kif jiġri spiss. L-ewwel iħallsu liż-żeffiena €50 u mbagħad jispiċċaw iħallsu dejjem aktar, kultant sa €200.”
Barra minn hekk, l-uniformijiet ġodda tal-pulizija blu u iswed dehru simili għal dawk li jintlibsu mill-bouncers, hija qalet. “Hu kien aggredit l-ewwel mill-bouncers u kien qed jiġi aggredit meta l-pulizija ntlaqat.”
“Fil-Gran Brittanja l-bouncers jilbsu l-iswed bil-blu u meta tkun fis-sakra ma tkunx taf jekk humiex uffiċjali tal-pulizija jew bouncers,” qal l-akkużat. “Sitta jew seba’ persuni jaqbżu fuqek. Huwa kaos.” Meta tat sentenza, il-Qorti kkundannat lir-raġel għal 14-il xahar ħabs, sospiżi għal tliet snin flimkien ma’ multa ta’ €800.
