Jinsabu fl-aqwa tagħhom il-preparamenti għas-serata finali tal-Konkors Kanzunetta Indipendenza – festival li se jsir il-Ġimgħa 22 ta’ Settembru.
Is-serata finali se tkun qed issir fi Pjazza Teatru Rjal, fil-Belt Valletta. U bħalissa għaddeja ħidma intensiva bl-aħħar tħejjijiet mil-lat loġistiku sa dakinhar tal-finali.
Apparti li l-pubbliku se jkun jista’ jsegwi l-20 kanzunetta, fis-serata finali se jkun hemm ukoll mistiedna speċjali l-band Different Minds, Claudia Faniello kif ukoll ir-rebbieħa tal-Konkors Kanzunetta Indipendenza 2021 Cherylis li se tniedi kanzunetta ġdida.
Dakinhar tal-finali se jingħata wkoll rikonoxximent lill-kantant jew kantanta li jiġi ivvutat mit-telespettaturi bħala rikonoxximent għall-ħidma tiegħu jew tagħha b’risq il-kanzunetta Maltija. Is-serata finali se tkun preżentata minn Valerie Vella u Chris Grech.
Il-biljetti għas-serata finali jistgħu jinkisbu minn www.ticketline.com.mt jew mill-binja ta’ NET Television mit-Tnejn sal-Ġimgħa mid-9 ta’ filgħodu sal-4 ta’ wara nofsinhar.
