It-tbatija f’għajnejn iċ-ċkejkin, persuni mingħajr saqaf fuq rashom b’tebqa t’għajn…ħerba sħiħa.
Kien dan li baqa’ jberren u jhewden f’moħħ l-Isqof Malti għal Benghazi, Sandro Overend Rigillo meta żar Derna wara l-maltempata Daniel li laqtet lill-Belt fl-aħħar jiem.
Maltempata li ħalliet ‘il fuq minn 11,000 vittma; ammont li skont rapporti fil-midja, saħansitra kapaċi jlaħħaq l-20,000 hekk kif eluf oħra għadhom irrappurtati neqsin.
Iżda żgur li ma jinsiex il-ħarsa ta’ tbatija fit-tfal ċkejknin.
“Fit-toroq tarahom xi ftit konfużi,” qal Fr Sandro. “Dik in-nofs tbissima taraha iżda tara t-tbatija f’għajnejhom, speċjalment jekk tilfu xi ħadd mill-familja.”
U waqt li għexieren ta’ eluf ta’ Libjani qed jiffaċċjaw futur mill-aktar inċert, kien ikkonfermat li talanqas 30,000 spiċċaw jitilfu djarhom fl-għargħar.
“Aħna tellajnilhom ilma, kutri, ħobż,” qal Fr Sandro. “Tellajna wkoll ħelu għat-tfal hekk kif dawn qed ibatu għax ma jifhmux. Dan hu bidu ta’ għajnuna mill-Knisja ta’ Benghazi.”
L-Isqof, jinsan f’Benghazi, li wkoll esperjenzaw xi ftit jew wisq mill-effetti tal-maltempata ‘Daniel’ għalkemm vittmi ma kienx hemm. Hu, flimkien ma’ delegazzjoni Maltija, telgħu Derna biex jagħtu l-għajnuna tagħhom fejn iddiskriva dak li ra quddiem għajnejh.
“Il-baħar is-soltu jkun kristall, kif nafu aħna,” qal Fr Sandro. “Rajna kilometri sħaħ imla bit-tajn. L-ewwel ħaġa li rajna u għidna x’diżastru ħalla dan kollu. Ma stajnix immorru n-naħa l-oħra għax l-pontijiet tfarku u ma stajnix ngħaddu.”
Sorsi qed jgħidu li t-tama li jinstabu aktar nies ħajjin dejjem qiegħda tonqos iżda għadha għaddejja ħidma intensiva sabiex jiġu salvati aktar nies dan filwaqt li l-vittmi mistennija li jkompli jiżdiedu matul is-sigħat.
Biex jagħtu l-għajnuna tagħhom, bil-Belt marru Membri mill-Protezzjoni Ċivili minn pajjiżna li permezz tal-ħidma tagħhom insabu ‘il fuq minn 400 katavru f’bajja f’Derna. Sfortunatament, fost il-vittmi kien hemm ukoll numru ta’ tfal; xeni li ġew deskritti bħala tal-waħx.
“Meta tara ġġib qalbek żgħira għax lanqas ikollok kliem x’tgħid,” qal Fr Sandro. “Is-silenzju kważi jitkellem aħjar mill-kliem għax il-qalb tħobb.”
