Raġel minn San Ġiljan inżamm arrestat wara li nhar it-Tnejn tal-ġimgħa l-oħra ġie akkużat li pprova jistupra Ċiniża li tagħmel il-massaġġi ingħata l-pleġġ u nħarġet ordni ta’ trattament fil-konfront tiegħu. Il-mara kienet qalet li rrifjutat it-talbiet tiegħu għas-sess.
L-imputat Malti ta’ 32 sena, li qal lill-Qorti li xogħolu huwa li jsuq trakk għall-ġbir ta’ l-iskart biex jgħix ingħata l-ħelsien mill-arrest wara li l-allegata vittma ddikjarat li r-raġel m’għamilx avvanzi ta’ natura sesswali fil-konfront tagħha. Qalet li dak il-ħin ma kinitx qed tħossha sew u kienet stordit għax ta xi daqqa.
Ir-raġel jinsab akkużat b’attentat ta’ stupru u li wettaq att sesswali mhux kunsenswali fuq il-mara, li żamm tagħha kontra r-rieda tagħha, kif ukoll li ssuġġetta lill-mara għal imġieba degradanti li kellha konnotazzjonijiet sesswali.
Ġew ippressati wkoll aktar akkużi relatati ma’ theddid u reżistenza vjolenti għall-arrest. L-Ispettur Joseph Busuttil kien qal lill-Qorti li fis-6 ta’ Settembru, ir-raġel kien mar fi stabbiloment tal-massaġġi fil-Pietà fejn talab “servizzi żejda” iżda ġie rrifjutat u mitfugħ barra mill-ħanut.
Imbagħad kien mar dritt f’massage parlour ieħor, din id-darba f’Birkirkara, fejn seħħ l-inċident. F’ħin minnhom, ir-raġel tal-vittma kien involut ukoll fil-kwistjoni u ssejħu l-pulizija, ngħad lill-Qorti. Fid-dawl ta’ dak li qalet l-allegata vittma l-Avukat difensur Roberta Bonello Felice infurmat lill-Qorti li f’dan l-istadju kienet se titlob il-libertà proviżorja u waqt il-preżentata kienet talbet ordni ta’ trattament speċifikament biex il-klijent tagħha jirċievi trattament psikoloġiku.
“Għandu bżonn ħafna għajnuna,” kienet qalet l-avukat lill-Qorti, li talbet li jiġi evalwat malli jiddaħħal f’kustodja preventiva fil-ħabs. L-Ispettur Joseph Busuttil, li qed imexxi l-prosekuzzjoni flimkien mal-Ispettur Andrew Agius Bonello, qabel mad-difiża dwar l-importanza li l-imputat jiġi evalwat u kkurat b’mod mediku, filwaqt li qal lill-Qorti li r-raġel bħalissa kien taħt superviżjoni kontinwa waqt li kien arrestat.
Il-Qorti kienet laqgħet it-talba u ħarġet rakkomandazzjoni qawwija mmirata lejn id-direttur tal-ħabs, fejn talbet li jsiru l-valutazzjonijiet meħtieġa mingħajr dewmien sabiex jiġi stabbilit x’trattament jeħtieġ l-imputat u fejn għandu jinżamm, “kemm għall-protezzjoni tiegħu kif ukoll bħal dik ta’ terzi”.
Ġie żvelat ukoll fil-Qorti li l-ġrieħi li setgħet sofriet l-allegata vittma kienu ta’ natura ħafifa. L-akkużat ingħata l-pleġġ fuq depożitu ta’ 500 ewro u garanzija personali ta’ 5,000. L-Avukat Cynthia Tomasuolo rrappreżentat lill-Uffiċċju tal-Avukat Ġenerali fil-proċeduri
