Uffiċjal tal-Awtorità Maltija tal-Logħob u martu rċevew ‘il fuq minn €150,000 mingħand l-eks konsulent tal-logħob Iosif Galea fuq medda ta’ tliet snin iżda sostnew li ma kinux jafuh, ħareġ fil-Qorti. Iżda l-investigaturi qalu lill-qorti li filwaqt li kienu fassal dawk il-pagamenti, ma setgħux jiskopru r-rabta bejn dawn it-tlieta jew ir-raġuni għaliex Galea għamel dawk it-trasferimenti ta’ flus.
Galea jinsab akkużat b’reati finanzjarji u ħasil ta’ flus relatati ma’ dawk il-ħlasijiet. L-uffiċjal Awtorità Maltija tal-Logħob, Jason Farrugia, kien dak iż-żmien l-uffiċjal tekniku ewlieni tar-regolatur. Filwaqt li d-dipartiment tal-investigazzjonijiet dwar ir-reati finanzjarji tal-pulizija investiga lil Galea, kienet għaddejja investigazzjoni parallela mit-taqsima tas-cyber crimw tal-pulizija dwar Farrugia, ħareġ il-Qorti.
L-investigazzjoni dwar Farrugia bdiet bis-suspett li kien qed joħroġ data illegalment lil Galea. L-uffiċjal kien qed jixhed fi proċeduri fejn Galea qed iwieġeb mhux ħati ta’ ħasil ta’ flus, reati finanzjarji u użu ħażin ta’ tagħmir elettroniku.
Meta l-każ kompla t-Tlieta, ix-xhud semma’ d-diversi tranżazzjonijiet li kienu jinvolvu lil Galea, li dak iż-żmien kien aġixxa bħala konsulent tal-gaming ma’ bosta kumpaniji u rċieva somom sostanzjali ta’ flus għas-servizzi tiegħu.
Bejn Awwissu 2018 u Settembru 2021, Galea kien bagħat lil Jason Farrugia madwar €130,600 permezz ta’ Revolut. Kien hemm transazzjonijiet oħra li bihom Galea bagħat flus kemm lil Farrugia kif ukoll lil martu, Christine, li bħalissa qed jiffaċċjaw akkużi simili fi proċeduri separati.
Bejn l-2017 u l-2020, Galea ħareġ sitt ċekkijiet lil Farrugia, li jammontaw għal €11,000. Inħarġu 22 ċekk ieħor lil mart Farrugia, li jammontaw għal €29,150.17 li minnhom ġew depożitati fil-kont ta’ żewġha fil-bank BNF. L-aħħar ċekk ma ġiex iddepożitat.
Madankollu, meta l-pulizija staqsew lill-koppja Farrugia, it-tnejn qalu li ma kinux jafu lil Galea u ma setgħux jispjegaw dawk it-tranżazzjonijiet. Meta mistoqsi jekk kellux xi negozju ma’ Galea, Farrugia kien għażel li ma jwieġebx.
Dak iż-żmien, Galea kien ingħata multa talli offra s-servizzi ta’ konsulenza tiegħu mingħajr liċenzja. L-investigazzjonijiet dwar reati finanzjarji ma kinux iddeterminaw ir-raġuni għaliex dawk il-flus kienu ġew trasferiti.
Dawk l-investigazzjonijiet inbdew minħabba leak suspettata ta’ data mid-database tal-awtorità minn Farrugia lil Galea, leak li kien qed jiġi investigat mill-pulizija tas-cyber crime. Mistoqsi mill-avukat difensur Edward Gatt jekk l-investigaturi finanzjarji kinux tkellmu mal-awtorità, ix-xhud wieġeb fin-negattiv.
Il-ksur suspettat tad-dejta kien qed jiġi investigat mill-fergħa tas-cyber crime. Mistoqsi jekk l-investigaturi kinux tkellmu mal-“kumpaniji l-kbar” li bagħtu fondi lil Galea, ix-xhud reġa’ qal “le”. Owen Bugeja, uffiċjal li jmexxi d-dipartiment tal-iżvilupp tas-software tal-Awtorità Maltija tal-Logħob xehed li Farrugia, bħala eks uffiċjal tekniku, kellu drittijiet sħaħ fuq is-sistema tal-awtorità.
Dak l-aċċess ġie mblukkat fid-9 ta’ Diċembru 2021, wara laqgħa mal-Kap Eżekuttiv wara li ħarġet għall-ewwel darba l-ksur suspettat tad-dejta. Konsulent għal aktar minn 70 operatur tal-logħob, Galea kellu aċċess għall-portal tal-MGA iżda ma kellu aċċess intern għall-ebda operatur li ma kellux x’jaqsam miegħu.
Mistoqsi mill-prosekuzzjoni dwar min awtorizza l-aċċess ta’ Galea, Bugeja qal li tali aċċess normalment jingħata mit-tim tal-awtorizzazzjoni. Galea kellu username u password waħda. Xi ħadd mil-laptop tax-xogħol ta’ Farrugia aċċessa l-kredenzjali ta’ Galea u ressaq l-applikazzjonijiet f’ismu.
Aktar investigazzjonijiet jistgħu jsibu “il-persuna wara dak il-laptop,” qal ix-xhud, filwaqt li spjega wkoll li Farrugia ma kellux bżonn username peress li permezz ta’ utenti interni, kellu aċċess għad-dokumenti kollha tal-operaturi tal-MGA.
L-isem ta’ Galea kien limitat biss għal dokumenti li kellu aċċess għalihom. Dakinhar li l-aċċess ta’ Farrugia ġie mblukkat, kien hemm attentat ta’ login iżda l-ebda attività. Il-kumpilazzjoni kienet ippreseduta mill-Maġistrat Rachel Montebello.
