Il-budget ta’ din is-sena jinsab biss ftit ġimgħat ‘il bogħod, u huwa għalhekk li l-Kap tal-Partit Nazzjonalista laqqa’ lill-imsieħba soċjali fil-Parlament.
Il-laqgħa mal-membri tal-Kunsill Malti għall-Iżvilupp Ekonomiku Soċjali, li bdiet il-Ġimgħa waranofsinhar, bit-tema ta’ ‘Viżjoni ekonomika għal ħajja aħjar f’pajjiżna’, saret sabiex il-Partit Nazzjonalista jagħraf il-bżonnijiet finanzjarji meħtieġa fis-sena li ġejja.
Dan hekk kif il-Partit Nazzjonalista ilu għal dawn l-aħħar xhur jitkellem fuq il-mudell ekonomiku ta’ pajjiżna, li jinsab taħt pressjoni minħabba ż-żieda fil-popolazzjoni Maltija filwaqt li ilu jaħdem bis-sħiħ sabiex jipprovdi ħajja aħjar f’pajjiżna għaċ-ċittadini Maltin.
Fid-diskors tiegħu, Bernard Grech qal li minkejja li l-Oppożizzjoni temmen bis-sħiħ fil-konsultazzjoni u fis-smiegħ, il-Partit Nazzjonalista flimkien mal-MCESD wettqu din il-laqgħa sabiex jifhem u jaħdem fuq dak li għandha bżonn l-ekonomija tal-pajjiż.
Hu qal ukoll, li il-konsultazzjoni hija importanti għaliex l-imsieħba soċjali, bħal Partit Nazzjonalista għandhom il-polz tal-poplu u s-settur li huma viċin tiegħu.
Intant, Bernard Grech stqarr illi l-pajjiż ma jistax jibqa’ miexi ‘l quddiem dan għaliex l-ekonomija mhux qed tiflaħ għaż-żieda fil-popolazzjoni – li deher ċar fil-kriżi tal-qtugħ tal-provvista tad-dawl, l-isptarijiet u fis-sistema edukattiva tal-pajjiż.
Hu kompla jgħid li huwa għalhekk li dan id-djalogu soċjali mal-msieħba soċjali, hu wieħed importanti għaliex il-Partit Nazzjonalista qiegħed jibbaża l-politika tiegħu fuq il-bniedem u l-bżonnijiet tal-poplu Malti.
L-imsieħba soċjali preżenti għal din il-laqgħa kienu, ic-Chairperson, is-Segretarju Eżekuttiv u l-Uffiċjal għall-Komunikazzjoni tal-MCESD, l-GWU, UĦM Voice of the Workers, ForUM, CMTU, MHRA, Chamber of SMEs, Malta Chamber of Commerce, l-MEA, Civil Society Committee, Gozo Regional Committee,
Preżenti għal din il-laqgħa kienu ukoll, Robert Cutajar, Claudette Buttigieg, Jerome Caruana Cilia, Mario Demarco, Ivan J.Bartolo, Alex Borg u Ivan Castillo.
