Waħda mill-iktar partiti mistennija ta’ din il-ġimgħa bejn Atalanta u Juventus spiċċat fi draw ta’ bla gowls.
Partita li fuq il-karta kienet totalment dominata minn Atalanta, bit-tim ta’ Gasperini joħloq 12-il opportunità għall-gowl filwaqt li Juventus joħolqu biss 3.
Il-pussess tal-partita kien meqjus maqsum l-istess bejn iż-żewġ skwadri.
L-ahjar azzjoni tal-partita waslet fil-74 minuta meta minn freekick mill-bogħod Luis Muriel ittanta xortih u b’xutt imdawwar sab ir-rokna ta’ fuq tax-xibka, bil-goalkeeper Polakk Szczesny jsalva mirakulużament u jżomm it-tim tiegħu fil-partita.
Roma 2-0 Frosinone
Roma irritornaw għar-rebħ wara t-telfa diżappuntanti li sofrew kontra Genoa b’rebħa ta’ 2-0 kontra Frosinone fl-Olimpico.
Romelu Lukaku kompla jura għalfejn huwa akkwist tajjeb u sab ix-xibka għal darb’oħra sabiex fetaħ l-iskor għall-Giallirossi meta żmarka ruħu tajjeb u mill-pass ta’ Dybala xeħet b’saħħa fix-xibka.
Roma isiġġilaw ir-rebħa fit-83 minuta permezz ta’ Lorenzo Pellegrini minn suġġeriment ieħor ta’ Dybala.
Bologna 3-0 Empoli
Bologna għelbu lil Empoli fil-Renato Dall’Ara b’Riccardo Orsolini jiddeċiedi l-partita b’hattrick f’ismu.
L-ewwel gowl tal-attakkant laterali wasal wara 21 minuti b’gowl tipiku tal-plejer jasal mil-lemin, fejn qabeż lil Walukiewicz tefa’ fuq ix-xellug u xeħet fir-rokna ta’ fuq.
Fis-66 minuta Bologna rduppjaw l-iskor bl-istess Orsolini jegħleb għal kollox lil Berishia minn suġġeriment ta’ Ferguson.
Orsolini kiseb il-hattrick personali tiegħu fl-aħħar mumenti tal-partita b’xutt ieħor bix-xellug din id-darba minn ġol-kaxxa mill-pass ta’ El Azzouzi.
Udinese 2-2 Genoa
Parità ta’ 2-2 bejn Udinese u Genoa, b’Udinese jiksbu punt permezz ta’ auto-gowl ta’ Matturro fl-aħħar minuti tal-partita.
Albert Gudmundsson kompla l-forma impekkabli tiegħu hekk kif sab ix-xibka l-ewwel fil-partita wara kważi kwarta logħob meta kkapitalizza fuq l-iżball ta’ Silvestri u xeħet ġewwa b’xutt potenti għall-vantaġġ.
Udinese ma damux ma kisbu d-draw hekk kif iż-żagħżugħ Lorenzo Lucca skorja gowl il-ġmiel tiegħu meta rċieva minghħand Kamara, ikkontrolla b’sidru u xxutja b’saħħa kbira fix-xibka.
Fil-41 minuta t-tieni gowl personali għal Albert Gudmundsson kif ukoll it-tieni gowl għal Genoa din id-darba mis-suġġeriment ta’ Retegui.
B’xortihom tajba Udinese kisbu d-draw fil-91 minuta permezz ta’ auto-gowl ta’ Alan Matturro li interċeta l-kross ta’ Samadzic u xeħet fix-xibka tiegħu stess.
Udinese spiċċaw il-partita b’għaxar plejers hekk kif fl-aħħar mumenti tal-partita tkeċċa l-midfielder Sandi Lovric wara li kkometta foul ikrah fuq Messias.
Riżultati u logħob li jmiss:
Is-Sibt:
Lecce v Napoli 0-4
Milan v Lazio 2-0
Salernitana v Inter 0-4
Illum:
Bologna v Empoli 3-0
Udinese v Genoa 2-2
Atalanta v Juventus 0-0
Roma v Frosinone 2-0
Għada:
Sassuolo v Monza 6:30pm
Torino v Verona 6:30pm
Fiorentina v Cagliari 8:45pm
