Il-Union tal-Edukaturi Professjonali (UPE) marret il-qorti biex tirrevoka deċiżjoni tat-Tribunal Industrijali li ma tħallihiex tirrappreżenta edukaturi ta’ appoġġ għat-tagħlim (LSEs). Il-union ressqet proċedimenti Kostituzzjonali kontra l-Avukat tal-Istat, id-Direttur Ġenerali għas-Servizzi Edukattivi u d-direttur tad-Dipartiment tar-Relazzjonijiet Industrijali u tal-Impjiegi (DIER) u qalet li tirrappreżenta l-maġġoranza tal-LSEs fl-iskejjel tal-Istat.
Hija kienet fittxet rikonoxximent uffiċjali sabiex tkun tista’ tassisti lill-membri tagħha fi proċeduri ta’ negozjar kollettiv iżda d-Direttorat għas-Servizzi Edukattivi oġġezzjona. L-UPE irreġistrat tilwima industrijali u l-kwistjoni ġiet riferuta lit-Tribunal Industrijali. It-tribunal ordna lid-DIER biex jivverifika jekk l-unjin fil-fatt irrappreżentatx il-maġġoranza tal-LSEs impjegati mill-istat.
Dak il-fatt kien sussegwentement ikkonfermat. Madankollu, f’Ġunju t-tribunal ikkonkluda li LSEs ma setgħux jitqiesu bħala ‘separate bargaining unit’ minn kategoriji oħra ta’ edukaturi u kienu koperti mill-ftehim kollettiv iffirmat bejn id-direttorat u l-Malta Union of Teachers.
L-avukati Therese Comodini Cachia u Jason Azzopardi, li jirrappreżentaw lill-UPE qalu li d-deċiżjoni tat-tribunal mhux biss kisret id-dritt tal-unjin li tirrappreżenta l-maġġoranza tal-LSEs fil-proċedura ta’ negozjar kollettiv iżda t-tribunal la kien indipendenti u lanqas imparzjali.
It-tliet membri fit-tribunal, jiġifieri Harold Walls, l-avukat Bryony Belzia Bartolo u Lawrence Mizzi, ġew maħtura minn entitajiet governattivi u kellhom karigi pubbliċi oħra. Dan tefa’ dubju fuq l-indipendenza u l-imparzjalità tagħhom.
Aktar milli jinnegozja ftehim kollettiv separat għall-LSEs, il-gvern kien qed jissuġġetta lil dawn l-edukaturi għall-ftehim attwali nnegozjat mill-MUT li ma indirizzax l-ilmenti u l-aspettattivi tal-membri tal-UPE.
L-UPE qed titlob lill-Prim’Awla, Qorti Ċivili fil-ġurisdizzjoni kostituzzjonali tagħha, biex tiddikjara li d-deċiżjoni tat-tribunal kisret id-dritt tiegħu għal-libertà ta’ għaqda u assoċjazzjoni u li l-proċess quddiem it-tribunal kien nieqes mill-imparzjalità.
Il-unjin talbet ukoll lill-qorti biex tirrevoka d-deċiżjoni tat-tribunal u tordna lid-Direttur tar-Relazzjonijiet Industrijali u tax-Xogħol jirrikonoxxi lill-UPE bħala l-union prinċipali li tirrappreżenta lill-LSEs. L-avukati Jason Azzopardi u Therese Comodini Cachia iffirmaw ir-rikors.
