Il-klabbs Hotsticks Hockey Club u Żurrieq Wolves ASC laħqu ftehim għal kollaborazzjoni bejniethom bħala promozzjoni tal-logħba tal-hockey.
Żurrieq Wolves ASC ġie mwaqqaf fl-1966 bl-għan li jinkoraġixxi l-attivita’ fiżika fost il-komunita’ u jipparteċipa f’bosta sport fuq livell lokali bħall-billiard, futbol u atletika.
Min-naħa tagħhom Hotsticks Hockey Club ilu mwaqqaf sa mill-1975 u huwa kkunsidirat bħala wieħed mill-klabbs ewlenin f’dan l-isport.
Wara li ġie ffirmat il-ftehim, il-president ta’ Hotsticks Hockey Club Andrei Imbroll stqarr li din il-kollaborazzjoni hi waħda storika għall-klabb u se tkompli tibni fuq it-tajjeb li tant ilu jsir tul dawn l-aħħar snin. Hu kompla jżid li l-klabb permezz tal-coaches tiegħu bdew is-sessjonijiet ta’ taħriġ fil-faċilita’ li hemm fiż-Żurrieq.
Il-president ta’ Żurrieq Wolves Dennis Caruana qal li dan hu wkoll mument storiku għall-klabb sportiv li hu ikona fir-raħal taż-Żurrieq. Hu sostna li t-tfal Żrieraq issa jistgħu jimirħu f’dan l-isport tant dinamiku u rringrazzja lil Hotsticks Hockey Club għal din il-kollaborazzjoni li se tħalli ħafna frott aktar ma jgħaddi ż-żmien.
