Kok u sid ta’ ristorant wieġeb mhux ħati li ta daqqiet ta’ virga tal-ħadid lil mara ġewwa r-ristorant tiegħu f’ Birkirkara kif ukoll akkużi ta’ droga f’dak li hu mifhum li hu attakk minħabba l-effetti tal-kokaina. Keith Gravina ta’ 41 sena mill-Floriana tressaq il-Qorti b’rabta mal-inċident tat-30 ta’ Settembru mill-Ispetturi tal-pulizija Andrew Agius Bonello u Clayton Camilleri quddiem il-Maġistrat Donatella Frendo Dimech l-Erbgħa wara nofsinhar.
Gravina kien mixli li attakka lill-mara, li r-relazzjoni tagħha mal-imputat mhix waħda ċara, u li kkaġuna ġrieħi gravi bi strument li jaqta’ u bil-ponta, kif ukoll li żamm lill-mara kontra r-rieda tagħha. Huwa kien akkużat ukoll bil-pussess u l-forniment ta’ kokaina, li m’obdiex l-ordnijiet leġittimi tal-pulizija u li kiser il-kundizzjonijiet tal-pleġġ li kienu ġew imposti fuqu f’Ġunju tal-2022.
L-akkużat ta’ 41 sena, li qal lill-qorti li “jaħdem fil-catering,” wieġeb mhux ħati tal-akkużi. L-avukat difensur Matthew Xuereb ma kkontestax il-validità tal-arrest u informa lill-qorti li f’dan l-istadju ma kinitx se tintalab il-libertà proviżorja.
Wara li l-qorti imponiet projbizzjoni fuq il-pubblikazzjoni tal-isem tal-vittma, id-difiża talbet projbizzjoni simili fir-rigward tal-imputat, għar-raġuni li l-investigazzjoni tal-pulizija kienet għadha għaddejja u l-fatt li l-akkużat kellu tfal żgħar. Il-qorti ċaħdet dik it-talba. “Messu ħaseb dan qabel,” qalet il-Maġistrat. L-Avukat Alex Scerri Herrera qed jirrappreżenta lill-mara bħala parte civile.
