Anzjan residenti Santa Venera weġġa’ gravi wara li karozza li kienet ipparkjata imxiet waħedha bil-konsegwenza li laqtitu.
L-inċident seħħ il-Ġimgħa filgħodu għall-ħabta ta’ 11:45 fi Triq Victor Tedesco, il-Ħamrun.
Il-Pulizija marru fil-post u minn investigazzjonijiet li saru rriżulta li karozza li kienet ipparkjata, għal xi raġuni, imxiet waħedha u laqtet anzjan ta’ 81 sena residenti Santa Venera kif ukoll żewġ vetturi oħra li kienu pparkjati. Eventwalment, il-karozza li mxiet waħedha spiċċat baqgħet dieħla f’ħajt.
L-anzjan ingħata l-għajnuna minn tim mediku, ittieħdet l-Isptar Mater Dei b’ambulanza u ġie ċċertifikat li weġġa’ gravi.
Il-Pulizija għaddejja bl-investigazzjonijiet fuq il-każ.
