Mara mill-Kolombja ġiet ikkundannata 14-il xahar ħabs wara li fl-appartament tagħha nstabu aktar minn 200 pillola ecstasy, u tnejn minn sħabha rċevew sentenzi sospiżi għall-prostituzzjoni wara rejds tal-pulizija. L-Ispetturi Joseph Busuttil u Dorianne Tabone akkużaw ukoll lil Ana Maria Ospina Gonzalez ta’ 28 sena u lil Juan Daniel Orozeo Castano ta’ 25 sena, wkoll mill-Kolumbja – b’parteċipazzjoni fl-operat ta’ burdell minn appartament fi Triq Bisazza, Tas-Sliema.
Il-Maġistrat Victor Axiak sema’ kif il-pulizija kienet aġixxiet fuq rapport dwar appartament li qed jintuża għall-prostituzzjoni u waqqfet operazzjoni ta’ sorveljanza, twila għal diversi ġimgħat. Ir-rapport ġie kkonfermat u nħarġu mandati ta’ arrest fl-4 ta’ Ottubru.
Ġewwa l-appartament instabu wkoll oġġetti relatati mal-prostituzzjoni – u xi €14,000 fi flus kontanti, qal l-Ispettur Tabone. Il-prosekuzzjoni esebit erba’ envelops issiġillati li fihom il-flus kontanti maqbuda mill-pulizija mill-appartament.
L-Avukat Noel Bianco, li deher għal Gonzales, informa lill-qorti li l-klijenta tiegħu se tkun qed tippreżenta dikjarazzjoni ta’ ħtija, filwaqt li enfasizza l-kooperazzjoni tagħha mal-pulizija u ammissjoni mmedjata. Irrimarka li sentenzi sospiżi kienu ġeneralment mogħtija f’każijiet simili, flimkien ma’ multa minima. Saħaq li l-klijenta tiegħu kienet ipprovdit għajnuna lill-pulizija.
It-tieni mara, Juan Daniel Orozco Castano, irrappreżentata mill-avukat tal-għajnuna legali Maria Karlsson wieġbet ħatja wkoll. Iż-żewġ nisa ġew ikkundannati 9 xhur ħabs, sospiżi għal 3 snin, flimkien mal-ħlas ta’ multa nominali ta’ €50 kull waħda. Il-Qorti spjegat lin-nisa li l-liġi tistipula li f’każijiet bħal dawn kellha tiġi imposta wkoll multa.
L-aħħar mara li tressqet il-Qorti kienet Eliana Espinosa Mejia ta’ 25 sena, li b’differenza minn sħabha ta’ nazzjonalità Kolombjana kienet ġiet arrestata f’appartament fi Triq Forest, San Ġiljan. Il-Pulizija kienet skopriet ammont ta’ aktar minn 200 pillola suspettata li fiha ecstasy, kif ukoll khat, pjanta stimulanti pprojbita popolari fil-Lvant Nofsani.
Hija wieġbet ħatja għall-pussess ta ‘ecstasy f’ċirkostanzi li indikaw li ma kienx biss għall-użu personali tagħha u sempliċi pussess ta’ khat. Waqt li għamel sottomissjonijiet dwar il-piena, l-avukat ta’ Espinosa Mejia Noel Bianco irrimarka li hija pprovdiet lill-pulizija b’informazzjoni dwar is-sjieda tal-pilloli, u talbet sentenza sospiża u deportazzjoni immedjata.
Il-maġistrat sejjaħ lill-avukat u lill-ispetturi biex jersqu lejn il-bank, fejn ipproċedew biex jiddiskutu l-każ privatament għal kważi 30 minuta. Meta d-diskussjoni spiċċat u kulħadd reġa’ lmara ura f’postu, l-imputata ġiet mistoqsija x’qed twieġeb. “Ħatja” wieġbet hi, permezz ta’ interpretu. “Int konxja li dan huwa punibbli bil-ħabs?” staqsiet il-qorti. “Iva,” wieġbet il-mara.
Meta qieset in-natura serja tad-delitt minn naħa u l-ammissjoni bikrija tal-ħtija tagħha kif ukoll l-assistenza tagħha fl-investigazzjoni tal-pulizija min-naħa l-oħra, il-maġistrat ikkundannat lill-mara għal 14-il xahar ħabs. Il-Qorti ordnat ukoll il-qerda tad-droga maqbuda. Wara li ngħatat is-sentenza, Espinosa Mejia bid-dmugħ f’għajnejha ġiet milqugħa u kkonslata mill-akkużati preċedenti qabel ma tmexxiet biex tibda tiskonta s-sentenza tagħha.
