Rebħa storika oħra għal Jonathan Ferris meta t-Tribunal Industrijali sab li kien tkecca mill-FIAU inġustament u għalhekk ordna lill-istess FIAU tgħaddilu kumpens ta’ €20,000. It-Tribunal sab li l-eks uffiċjal li kien fil-pożizzjoni ta’ Manager kien tkecca b’mod diskriminatorju u nġust.
Iċ-Chairman tat-Tribunal Anna Mallia qalet dan fid-dawl tat-tkeċċija ta’ Ferris mill-Financial Intelligence Analysis Unit, liema mpieg tiegħu ġie tterminat fl-2017. Ferris kien ippreżenta proċeduri quddiem it-Tribunal Industrijali kontra ċ-Chairman tal-FIAU ta’ dak iż-żmien Peter Grech – sussegwentement mibdul minn Jesmond Gatt f’Novembru 2020 – fejn sostna li kien suġġett għal trattament diskriminatorju.
Meta tat id-deċiżjoni tagħha l-Ġimgħa, iċ-chairperson Anna Mallia osservat li probation li kienet għada għaddejja fil-konfront ta’ Ferris – min iħaddem ma jistax jagħmel li jrid sempliċement għax l-impjegat għadu għaddej bi proċess. Pjuttost, irid jiżgura li l-ġdid ikun qed iwettaq dmirijietu tajjeb.
Huwa għandu joffri lill-impjegat l-appoġġ u l-assistenza kollha meħtieġa biex jgħinuh jintegra fl-ambjent tax-xogħol il-ġdid aktar milli jissuġġettah għal diskriminazzjoni jew vittimizzazzjoni permezz ta’ strateġija li twassal għat-tkeċċija tiegħu.
Ferris sofra diskriminazzjoni waqt il-probation? Ferris sostna li kien hemm “raġunijiet politiċi” wara t-tkeċċija tiegħu u għalhekk, sofra diskriminazzjoni. Fuq il-bażi tal-provi mressqa, it-tribunal laqa’ dik it-talba, billi osserva li l-kollegi ta’ Ferris fl-FIAU ma kinux iffaċċjaw l-istess destin.
L-inkwiet deher jinqala’ meta r-rapporti tal-FIAU dwar suspett ta’ ħażen fil-Bank Pilatus, każ li issa ġie magħluq inħarġu fil-midja. Dak kien meta Ferris ma kienx aktar fdat, kuntrarjament għal uffiċjali sħabu, inklużi tliet analisti ġodda, li kienu jaqsmu l-istess password komuni bħal Ferris.
Fil-fatt, qal it-Tribunal – it-tim kollu jaqsam dik il-password, għalkemm is-sistema setgħet tiskopri kwalunkwe login u kwalunkwe bidla effettwata fiha. Madankollu, is-suspetti kollha waqgħu fuq Ferris bħala dak li kien ħareġ dawk ir-rapporti.
Fit-2 ta’ Mejju 2017, jumejn wara li ra r-rapport Pilatus imfassal mill-analista tal-konformità, Ferris ingħata struzzjonijiet biex jevita kull investigazzjoni li tikkonċerna l-bank. Is-superjuri tiegħu sostnew li kellu kunflitt ta’ interess peress li kien investiga u arresta lill-eks-impjegata tal-Pilatus, Maria Efimova, għal allegat frodi fil-konfront tal-bank.
Madankollu, kien għadu jżomm il-pożizzjoni tiegħu bħala Kap tat-Taqsima, qal Ferris fix-xhieda tiegħu.Iżda wara dik id-data, kien imwarrab fid-diskussjonijiet kollha tal-FIAU dwar persuni esposti politikament. Membri oħra tat-tim ma kinux.
It-tribunal naqas milli jifhem kif l-FIAU sostniet li ma kinitx sodisfatta bil-prestazzjoni ta’ Ferris, iżda fl-istess ħin żammewh bħala Kap, anke meta bdew il-leaks. Huwa tqies ukoll affidabbli biżżejjed biex jirrappreżenta lir-regolatur kemm lokalment kif ukoll barra minn Malta, kultant akkumpanjat minn dawk l-istess nies u li wara ġie ċċertifikat li ma wettaqx sew.
Lanqas ma ġie ppruvat li kien ħareġ dawk ir-rapporti għax ma kienx l-unika persuna fl-FIAU li kellu aċċess għalihom. Ma ġiex ippruvat li rekords “sensittivi” ma kinux ittieħdu minn oħrajn li kienu qabel Ferris fl-FIAU.
L-ewwel rapport dwar Pilatus bank ma kienx ippreparat minn Ferris u dak li jikkonċerna lil Adrian Hillman sar qabel żmienu. Rapport ieħor dwar kickbacks suspettati bejn Hillman u l-eks chief of staff f’Kastilja Keith Schembri ingħata biss lil Ferris biex jiffirma meta ngħaqad mal-FIAU għall-ewwel darba.
Żewġ rapporti dwar Schembri tlestew f’Ġunju 2016 u Novembru 2016 għaddew lill-pulizija, iżda Ferris iffirma biss it-tieni wieħed. Ma fassalx ukoll ir-rapport dwar l-eks ministru Konrad Mizzi u l-bord qatt ma ltaqa’ biex jiddeċiedi jekk jgħaddihx lill-pulizija.
Fir-rigward ta’ rapport ieħor dwar it-tanker tal-LNG, kien iffirmat biss minn Ferris u mhux iffinalizzat mill-bord tal-FIAU. Wara li kkunsidrat kull wieħed minn dawn ir-rapporti, it-tribunal ikkonkluda li ma kien hemm l-ebda prova li dawn kienu ġew leaked minn Ferris.
Sadanittnat it-Tribunal ma kienx ta raġun lil Ferris, żmien ilu – u li minn naħa tiegħu kien ħa l-każ il-Qorti fejn l-Imħallef Wenzu Montoff kienet ordna li t-Tribunal biex jerġa’ jara l-każ mill-ġdid u jidħol aktar fil-fond. “Il-motivazzjoni tat-Tribunal kienet “fqira u nieqsa minn ċarezza,” kienet osservat il-Qorti tal-Appell.
Finalment Ferris, li meta kien l-FIAU għamel minn kollox biex jikxef il-korruzzjoni li kienet għaddejja fejn stejjer tal-ġurnalista maqtula Daphne Caruana Galizia, kienu qed jingħataw importanza anke mill-istess FIAU kienu qed jingħataw prominenza, iżda f’daqqa waħda, kollox waqaf, b’Ferris jitneħħa mill-kariga u kollox waqaf ħesrem.
F’Mejju tal-2022, it-Tribunal kien warrab it-talbiet ta’ Ferris, u kkonkluda li l-FIAU kellha dritt li tittermina peress li Ferris kien għadu fil-perjodu ta’ probation. Biex issa meta l-każ reġa’ nstema’ mill-istess Tribunal Industrijali fuq ordni tal-Qorti, dan l-argument sfaxxa u għal darba oħra Jonathan Ferris ingħata raġun.
Ferris kien ġie assenjat diversi każijiet biex jinvestiga, kien irċieva taħriġ barra minn Malta u kien beda jaħdem fuq id-dmirijiet assenjati tiegħu, innota t-Tribunal. Meta ta s-sentenza, l-imħallef Mintoff kien osserva li l-fatt li t-Tribunal ma kienx investiga t-talba ta’ Ferris kif suppost kellu, kien diverġenza ta’ opinjoni.
Lawrence Cutajar ukoll kien instab ħati ta’ trattament diskriminatorju fil-konfront ta’ Ferris
F’Diċembu li għadda l-eks Ispettur tal-Pulizija Jonathan Ferris kien ukoll ingħata kumpens ta’ €20,000 minħabba trattament diskriminatorju li ġarrab fi żmien l-eks Kummissarju tal-Pulizija Lawrence Cutajar. Fl-2019 Ferris kien fetaħ proċeduri għad-danni fejn sostna li n-nuqqas tal-Kummissarju li jdaħħalu lura fil-korp tal-Pulizija wara li kien tkeċċa mill-FIAU Unit kiser id-drittijiet fundamentali tiegħu.
Ferris kien sostna wkoll li d-drittijiet tiegħu komplew jinkisru bid-deċiżjoni oriġinali li biha ma ngħata ebda secondent mill-korp tal-Pulizija mal-FIAU. Matul it-tliet snin ta’ qabel madwar 26 uffiċjal tal-Pulizija kienu ġew issekondati bla problemi f’entitajiet governattivi oħra kif ukoll fis-settur privat.
Peress li Ferris ma kienx ġie ssekondat, meta mbagħad ingħaqad mal-FIAU fl-2016 l-eks Pulizija ma kellu ebda għażla oħra għajr illi jħalli l-korp. Fil-Qorti Ferris kien saħaq illi kaġun ta’ dan it-trattament diskriminatorju tilef ukoll id-dritt għall-pensjoni tas-servizz.
F’Mejju 2016, Ferris kien ġie mħeġġeġ japplika għar-rwol ta’ Financial Analysis Manager fl-FIAU. Wara l-proċess tal-intervista kien intgħażel f’Lulju 2016 u għaldaqstant informa lill-Kummissarju tal-Pulizija li xtaq jingħaqad mal-FIAU fuq sekondament bħalma kien intitolat li jagħmel.
Għal xi raġuni t-talba ta’ Ferris baqgħet ma ntlaqgħetx, tant li kellu jirriżenja mill-korp u beda jaħdem mal-FIAU mingħajr ebda sekondament. Madankollu fil-qadi tar-rwol tiegħu ta’ Financial Analysis Manager Ferris osserva bosta nuqqasijiet.
Ferris ftit li xejn kien ħassu komdu bis-sitwazzjoni, tant li f’Mejju ltaqa’ mal-Kummissarju Lawrence Cutajar u l-Assistent Kummissarju Mario Spiteri u talabhom b’mod formali biex jerġa’ jidħol fil-korp. Madankollu daqs xahar wara din il-laqgħa ssejjaħ fl-uffiċċju tad-Direttur tal-FIAU u ngħata ittra ta’ terminazzjoni tal-impjieg tiegħu mingħajr ebda spjegazzjoni.
F’Lulju 2017 imbagħad Ferris ressaq talba uffiċjali oħra biex jerġa’ jidħol fil-korp iżda baqa’ mingħajr tweġiba. Wara li qies iċ-ċirkustanzi tal-każ l-Imħallef Toni Abela fis-sentenza tiegħu kien ta lil Ferris €20,000 f’kumpens għad-danni.
Ferris ifittex biex jimblokka l-ħatra ta’ supretendenti ġodda
Il-ġimgħa l-oħra Jonathan Ferris ippreżenta protest fil-Qorti fejn qed ifittex li jimblokka l-ħatra ta’ supertendenti ġodda fil-korp sakemm kawża fil-qorti li jagħmel parti minnha tiġi konkluża definittivament. Ferris qed jargumenta li d-deċiżjoni tal-qorti tal-appell se jkollha impatt fuq l-eliġibilità tiegħu biex japplika għall-dawn il-karigi.
Il-protest ġudizzjarju tiegħu, ippreżentat quddiem il-qrati ċivili, isegwi deċiżjoni tal-qorti f’Diċembru li għadda li sabet li kien diskriminazzjoni kontrih meta ma reġax iddaħħal fil-korp tal-pulizija bħala spettur wara li serva fil-Financial Intelligence Analysis Unit. Dik is-sentenza ġiet appellata mill-awtoritajiet.
Ferris argumenta quddiem il-Prim’Awla tal-Qorti Ċivili fi proċedimenti kostituzzjonali li 152 eks pulizija kellhom it-talba tagħhom biex jerġgħu jidħlu fil-korp approvata mill-2010 iżda t-talba tiegħu stess baqgħet mingħajr tweġiba.
Ferris kien ħa kariga fl-FIAU fl-2016. Dak iż-żmien kien talab li jiġi sekondat, kif kien ingħata lil 26 pulizija ieħor li kienu ssekondati ma’ entitajiet governattivi oħra u s-settur privat. Iżda t-talba tiegħu intlaqgħet b’reżistenza u fin-nuqqas ta’ dan, ta avviż ta’ riżenja mill-korp.
Ftit xhur wara, ħarġu rapporti fil-midja dwar rapporti tal-FIAU li ħarġu dwar Persuni Politikament Esposti u l-ftehim tat-tankers tal-LNG. Ferris qal li ma kellu xejn x’jaqsam ma’ dawk il-leaks, iżda hekk kif is-sitwazzjoni fl-FIAU marret għall-agħar, talab lill-Kummissarju tal-Pulizija ta’ dak iż-żmien Lawrence Cutajar biex ifittex li jerġa’ jdaħħal fil-korp.
Huwa qallu biex jistenna “sa wara l-elezzjoni.” Iżda ladarba għaddiet l-elezzjoni, xorta ma kiseb l-ebda risposta. Fil-protest ġudizzjarju tiegħu, huwa rriserva d-dritt għal aktar azzjoni legali inkluż dik li jfittex għal telf ta’ dħul. Tul dawn il-proċeduri kollha dehru għal Jonathan Ferris l-avukati Andrew Borg Cardona, Therese Comodini Cachia, Jason Azzopardi u Evelyn Borg Costanzi u Roslyn Borg Knight.
