Il-Qorti tal-Appell ikkonfermat sentenza minn ġuri bla ġurati fil-konfront ta’ żagħżugħ ta’ 22 sena, li kien ġie kundannat 20 sena ħabs. Huwa kien instab ħati li f’Jannar tal-2019 stupra lil omm l-exks tfajla tiegħu b’oġġett fid-dar tagħah f’Marsascala fejn għamel żmien jgħix.
Huwa kien instab ħati ta’erba’ kapi t’akkuża fejn il-ħati ma jistax jissemma’ biex tiġi protetta l-identità tal-vittmi. Hu kien instab ħati wkoll li fl-istess perjodu ġiegħel lil oħt l-eks tfajla tiegħu tistupra lil ommha, li kkaġuna biża’ lill-vittmi li se tintuża vjolenza kontrihom u li kellu x’jaqsam mat-tfajla tiegħu meta kienet għadha taħt l-età.
Waqt il-ġuri kienu ħarġu diversi fatti fosthom li huwa kien jagħmel ħsejjes b’tali mod li l-vittmi kienu jaħsbu li kien hemm id-dimonju fid-dar u li kienu jagħmlu dak li jgħidilhom. Il-ħati kien ukoll ġie ordnat iħallas bi kważi €8,000 fi spejjeż tal-Qorti u li ismu jitniżżel fir-reġistru tal-persuni li jwettqu reati sesswali. Fil-konfront tal-omm, il-Qorti ordnat ordni ta’ protezzjoni għal tliet snin.
L-Imħallef Consuelo Scerri Herrera, kienet ikkonkludiet li r-reati wettaqhom l-akkużat u mhux l-ispirti fid-dar kif kien qal hu. Fl-appell, iż-żagħżugħ ilmenta fost l-oħrajn dwar inkonsistenzi fil-fehma tiegħu fil-verżjonijiet tal-vittmi u dwar nuqqas ta’ provi.
Qal lli omm l-eks tfajla tiegħu, allegatament, ipprattikat l-okkult għal snin twal u kienet miġbuda lejn riti sataniċi u li għaldaqstant il-vuċijiet li hi allegat li bdew jinstemgħu f’darha kienu diġà qed jippersegwitawha minn żmien qabel ma huwa beda joħroġ ma’ bintha, u li allura ma kellux x’jaqsam magħhom.
Madankollu l-Qorti tal-Appell, ippreseduta mill-Prim Imħallef Mark Chetcuti u l-Imħallfin Edwina Grima u Giovanni Grixti, qalet li l-akkużat abbuża minn persuna dgħajfa u minn uliedha billi wettaq vjolenza fuqhom u attakka d-dinjità tagħhom bl-agħar mod possibbli.Fost il-vittmi kien hemm oħt l-eks tfajla tiegħu. Għall-ħati deher l-Avukat Mario Mifsud.
