Matul il-lejl li għadda r-Russja wettqet madwar 36 attakk bid-drones fuq diversi bliet fl-Ukrajna. L-attakki kienu mmirati lejn ir-reġjuni ta’ Odesa, Mykolaiv kif ukoll Kherson.
Minn naħa tagħhom il-qawwiet Ukreni qalu li rnexxielhom jeqirdu 27 drone waqt l-attakki ta’ matul il-lejl.
Waqt laqgħa tan-Nazzjonijiet Uniti ġie kkundannat l-attakk tar-Russja fuq villaġġ żgħir waqt funeral ta’ suldat – attakk li ħalla familji sħaħ mejta bil-vittmi jammontaw għal 52. Waqt il-laqgħa intqal li dan kien wieħed mill-agħar attakki li qatt ħejja il-Kremlin mill-bidu tal-kunflitt mal-Ukrajna.
Intant, matul il-jum tat-Tlieta l-President Ukren Volodomyr Zelensky mar ir-Rumanija fejn f’laqgħa mal-President Rumen ġie diskuss pjan ta’ difiża mill-ajru. Minn naħa tiegħu Zelensky qal li din id-diskussjoni kienet ta’ benefiċċju kbir għaż-żewġ pajjiżi.
