Mietu talanqas seba’ persuna, inklużi tfal, wara li minivan ippakkjat bin-nies – x’aktarx li immigranti illegali – inqaleb viċin ta’ Ampfing, fil-limiti ta’ Munich, fl-Istat ta’ Bavarja.
L-indikazzjonijiet huma li l-vettura kienet misjuqa minn traffikant tal-immigranti u meta fil-minivan kien hemm aktar min 20 immigrant, li wħud minnhom sfaw midruba gravi fl-inċident.
It-traġedja seħħet meta s-sewwieq tal-minivan ipprova jevadi lill-pulizija li kienu għassa ma’ roadblock u fejn spiċċa jitlef il-kontroll f’ħin meta l-uffiċjali kienu qed jippruvaw jinterċettaw lill-vettura bil-liċenzja tar-reġistrazzjoni Awstrijaka.
It-traġedja qed tixħet attenzjoni akbar fuq it-traffikar tal-bnedmin lejn l-Ewropa u meta l-pajjiżi Ewropej tal-Lvant u taċ-Ċentru qed jimponu aktar kontrolli mal-fruntieri.
Fl-aħħar ġimgħat kien hemm inċidenti simili f’numru ta’ pajjiżi Ewropej u meta proprju l-Ħamis, mietu talanqas żewġ immigranti meta l-karozza li kienu qed jivvjaġġaw fiha bil-moħbi nqalbet f’zona tal-Ungerija.
