Il-Qorti tal-Appell ikkonfermat li l-Awtorità tal-Ippjanar aġixxiet illegalment meta ppermettiet it-twaqqigħ parzjali tal-bini li qabel kien jintuża’ mis-Sea Malta fil-Marsa. Dan fuq rapport ta’ perit tal-Enemalta li l-istruttura kienet perikoluża, minflok ħatret perit tagħha stess.
Il-Qorti ddeċidiet ukoll li l-interess ġuridiku ta’ dawk li jikkontestaw dik id-deċiżjoni għadu jeżisti minkejja li l-binja kienet twaqqgħet. Il-Kamra tal-Periti flimkien mal-NGOs ambjentali Din l-Art Ħelwa u Flimkien għal Ambjent Aħjar kienu ressqu proċeduri kontra l-Awtorità tal-Ippjanar u l-Enemalta dwar it-twaqqigħ tal-binja tul Xatt l-Għassara tal-Għeneb, il-Marsa.
L-istruttura nbniet fl-1948 bħala maħżen u faċilità ta’ rikreazzjoni għan-Navy Brittanika, l-Armata u l-Forza tal-Ajru. Il-bini kien magħruf l-aktar bħala l-akkomodazzjoni tal-ħwienet imsejjaħ NAAFI. L-Enemalta kienet fittxet li twaqqa’ permezz ta’ applikazzjoni għal Ordni ta’ Żvilupp (Tneħħija ta’ Periklu) lill-Awtorità tal-Ippjanar.
Il-Kamra tal-Periti kienet immedjatament oġġezzjonat, u qalet li dan kien eżempju tajjeb ta’ arkitettura modernista li nzerta wkoll f’żona protetta indikata bħala “żona ta’ valur għoli ta’ pajsaġġ tas-swar tal-port.”
Sakemm il-kwistjoni waslet il-qorti, it-twaqqigħ kien tkompla. F’Novembru li għadda, il-Prim’Awla tal-Qorti Ċivili laqgħet it-talba tar-rikorrenti, billi ddikjarat li l-Awtorità setgħet biss ħarġet tali ordni biex jitwaqqa’ “wara spezzjoni dettaljata fuq il-post minn perit jew inġinier ċivili maħtur mill-Awtorità.”
Eks-kap eżekuttiv tal-Planning Authority kien xehed li kienet drawwa li l-Awtorità tiddependi fuq rapporti tal-periti mehmuża mal-applikazzjonijiet, aktar milli tqabbad perit indipendenti biex jispezzjona s-sit. Iżda l-ewwel qorti kkonkludiet li l-ordni tal-Awtorità kienet ultra vires (lil hinn mis-setgħat) u konsegwentement ix-xogħlijiet kollha li saru biex jitwaqqa’ l-Bini tas-Sea Malta saru illegalment.
Il-qofol tal-kwistjoni kien jikkonċerna d-dispożizzjoni legali obbligatorja li ddikjarat li xogħlijiet ta’ emerġenza biex titneħħa struttura perikoluża setgħu jingħataw greenlighted biss wara spezzjoni dettaljata fil-post mill-perit jew inġinier maħtur mill-Awtorità.
F’dan il-każ, il-perit David Mallia, responsabbli mid-diviżjoni tal-Istrutturi Perikolużi fil-PA, kien żar il-bini tas-Sea Malta iżda kien irnexxielu jispezzjona biss il-parti ta’ quddiem. L-aċċess għat-tarf ta ‘wara tal-bini kien “imblukkat.”
Għalhekk Mallia kien ħa vjaġġ bid-dgħajsa biex jara l-bini minn fuq il-baħar, osserva dik il-faċċata li tagħti fuq l-ilma, evalwa l-kundizzjoni tiegħu. Aktar tard spjega li dik iż-żjara kkonfermat l-istat tal-bini kif jidher fir-ritratti annessi mar-rapport.
Imma ma kienx daħal fit-tarf ta’ wara tal-bini u lanqas ma pprepara rapport dwar iż-żjara tiegħu dakinhar. Aktar tard l-Awtorità fittxet li tiġġustifika dawn in-nuqqasijiet billi qalet li “ma saritx spezzjoni tas-sit minħabba l-livell ta’ dettall tal-analiżi strutturali li kienet saret mill-perit indipendenti u l-kwantità ta’ materjal illustrattiv li kien fih. ”
Madankollu l-perit li fassal ir-rapport ma kienx indipendenti iżda inkarigat mill-Enemalta, osservat il-qorti. Ladarba l-Awtorità aġixxiet ultra vires, injorat dak ir-rekwiżit legali obbligatorju, ix-xogħlijiet ta’ twaqqigħ kienu illegali.
L-Enemalta sostniet fl-appell tagħha li l-appellanti kienu ġrew lejn il-midja bl-ewwel sentenza, u ppubblikaw l-istorja meta l-intimati xorta kellhom dritt jappellaw dik id-deċiżjoni. Madankollu l-imħallfin osservaw li tali rapporti tal-qorti kienu konformi mad-dritt għal-libertà tal-espressjoni.
Is-sentenzi tal-ewwel qrati kienu rrappurtati ta’ spiss mill-midja anke meta l-proċedimenti kienu suġġetti għal appell. Fl-aħħar il-qorti ċaħdet l-appelli kemm mill-Planning Authority kif ukoll mill-Enemalta bl-ispejjeż. L-Avukati Claire Bonello assistiet lir-rikorrenti.
