Colin Schembri
Caffè Moak Luxol……57
Starlites JSD…………….67
(13-21)(13-16)(23-13)(8-17)
Caffè Moak Luxol u Starlites JSD iltaqgħu għat-tieni darba dan l-istaġun u mill-ġdid kienu il-players ta’ Fatih Dedeliouglu li ħarġu rebbieħa din id-darba fil-John Tabone Shield 67-57. Għal Luxol irritornat Lisa Fenech Pace fil-waqt li Starlites kienu mingħajr Christina Curmi. Il-partita fetħet bi trippla tal-Amerikana Tayler Bennett ta’ Luxol però pronta kienet ir-risposta ta’ Starlites primarjament minn Steffi De Martino li waħedha għamlet 9 punti mingħajr risposta. Luxol naqqsu d-distakk bil-punti ta’ Benett u Lisa Fenech Pace però Starlites kellhom trippla ta’ Mikela Riolo. Free-throws ta’ Josephine Diaby u Fenech Pace reġgħu ressqu lil Luxol viċin iżda Starlites għalqu t-taqsima bi trippla minn Paige Cannon għal skor ta’ 21-13. It-tieni sessjoni fetħet bi trippla fuq kull naħa qabel ma Starlites kellhin run ta’ 11-1 bi trippli minn Riolo u Cannon biex fetħu vantaġġ ta’ 16 -il punt 35-19. Ir-risposta ta’ Luxol ġiet minn L. Fenech Pace b’5 punti konsekuttivi però fl-intervall Starlites kienu 37-26 minn fuq.
Fit-tielet taqsima, Starlites żammew il-vantaġġ ta’ 11 -il punt fl-ewwel ħinijiet wara punti minn Cannon u Michela Zammit Cordina. Paige kompliet tkabbrilhom il-vantaġġ b’żewġ trippli oħra għalkemm Luxol ukoll kellhom it-three pointers minn Fenech Pace u Bennett. Hawn wasal l-aqwa mument ta’ Luxol fil-partita fejn għamlu run ta’ 13-0 bi trippla ta’ Anna Fenech Pace u l-punti ta’ Sarah Sciberras u Diaby biex naqqsy d-distakk għal punt 49-50. Fl-ewwel minuti tal-aħħar taqsima, id-distakk baqa’ l-istess. Hawn Starlites kellhom run deċisiva ta’ 9-0 maqsuma bejn Maria Bonett u De Martino biex reġgħu ħadu vantaġġ ta’ 10 punti li żammew sat-tmiem biex rebħu l-partita 67-57.
Caffè Moak Luxol: L. Fenech Pace 14, T. Bennett 14, H. Galea, M. Camilleri, S. Fenech Pace 7, J. Diaby 6, J. Said, V. Baldacchino, S. Sciberras 4, S. Farrugia 5, M. Marmara, A. Fenech Pace 7.
Starlites JSD: M. Zammit Cordina 7, M. Riolo 9, A. Saliba, S. Tabone, M. Bonett 12, S. De Martino 20, P. Cannon 19, P. Riolo, M. Fenech, C. Cilia, S. Davies, C. M. Vella.
Referees: Nicky Azzopardi, Artun Bayraktar
Fusion Quest……….57
Hibernians……………89
(6-24)(12-25)(18-19)(21-21)
Hibernians ħadu l-ewwel rebħa fis-shield meta għelbu lil Fusion Quest 89-57 u b’din it-telfa Fusion huma eleminati. Fusion komllew iżidu l-players fl-iskwadra fejn irritornaw Milica Stefanovic u Natalija Pejcic u ntroduċew lil Sylvia Friend fil-waqt li Hibs kellhom lil Kelly Conti tieħu post Jasmine Abela. Wara bidu kwiet, Hibs għamlu run ta’ 12-0 ħafna minnhom mill-Amerikana Lindsay Whilbey li għamlet 10 punti konsekuttivi fosthom żewġ trippli. Fusion għamlu żewġ trippli minn Pejcic u Julia Schembri li kienu l-uniċi punti tagħhom f’din it-taqsima. Minn hemm ‘l quddiem kienu biss Hibs li għamlu l-punti f’run oħra ta’ 9-0 bi trippla oħra ta’ Whilbey għal skor ta’ 24-6. Hibs iddominaw it-tieni sessjoni fejn wara li Fusion għamlu l-ewwel basket minn Marija Momcilovic, kien hemm break qawwi ta’ 22 punt mingħajr risposta mill-players ta’ Sandro Farrugia b’diversi punti ta’ Whilby flimkien ma’ Julija Dabic, Fanni Fabok, Marie Buhagiar u Iona Agius. Finalment Fusion irrispondew b’żewġ trippli minn Momcolivic u Stefanovic però fil-halftime Hibs kienu 49-18 minn fuq.
Il-bidu tat-tielet taqsima kien aktar bilanċjat għalkemm dejjem fil-kontroll tal-Pawlisti. Huma kellhom run oħra ta’ 9-3 biex kabbru l-vantaġġ għal 36 punt 62-26. Hawn Fusion irnexxielhom jagħmlu 10 punti konsekuttivi kollha minn Agustina Ledesma biex Hibs temmew il-perjodu 68-36 minn fuq. L-aħħar sessjoni kienet l-aktar waħda bilanċjata tant li spiċċat f’parita ta’ 21-21 fejn fetħet bi trippla minn Eliza Farrugia bi Fusion jirispondu bi break ta’ 8-0 bi trippli minn Hayley Grixti u Pejcic. Għal kumplament tal-partita ż-żewġ timijiet komplew jirrispondu lil xulxin fosthom bi trippli minn Amy Mallia għal Hibs u Schembri għal Fusion biex Hibs ħarġu rebbieħa 89-57.
Fusion Quest: H Grixti 3, M. Stefanovic 7, M. Momcilovic 5, S. Friend, E. Pace, A. Ledesma 16, M. R. Opanszki, J. Schembri 14, N. Pejcic 6, P. Carona 6.
Hibernians: M. Buhagiar 4, E. Farrugia 5, F.Fabok 4, I. Agius 9, L. Whilby 37, B. Agius 3, K. Calleja 6, N. Farrugia, K. Conti, K. Caruana 2, A. Mallia 5, J. Dabic 14.
Referees: Bernard Vassallo, Antun Bayraktar.
