Splużjoni fi sptar f’Gaza ħasdet il-ħajja ta’ mill-anqas 500 persuna fit-territorju Palestinjan, bil-Hamas jakkuża lill-Iżrael b’attakk mill-ajru, li sejjaħlu bħala “kriminalità tal-gwerra”.
Min-naħa l-oħra Iżrael ċaħad l-involviment, u attribwixxa l-isplużjoni għal sparatura mhux intenzjonata mill-Jihad Islamika Palestinjana. Intant, il-Jihad Iżlamika Palestinjana, it-tieni l-akbar grupp militanti f’Gaza, ċaħdet kull responsabbiltà għall-isplużjoni.
Sussegwentament mexxejja tal-Ġordan, l-Eġittu, u l-Awtorità Palestinjana kkanċellaw summit skedat mal-President Amerikan Joe Biden. Il-President Biden bħalissa jinsab fi triqtu lejn l-Iżrael għal taħditiet mal-mexxejja Iżraeljani fost tensjonijiet kbar.
Il-Hamas u l-Hezbollah tefgħu t-tort kemm fuq l-Istati Uniti kif ukoll fuq Iżrael għall-isplużjoni tal-isptar. Barra minn hekk, grupp ta’ dimostranti organizza protesti matul il-lejl barra l-ambaxxata Amerikana f’Bejrut, u wrew ir-rabja tagħhom billi qabdu n-nar u dendlu bnadar Palestinjani fuq il-ħitan tal-ambaxxata.
