Għal dawk kollha li jħobbu ċ-ċikkukata nhar is-Sibt li ġej se titella t-13-il edizzjoni tal-Festival taċ-Ċikkukata fil-Ħamrun – festival fejn żgur se jispikka t-talent Malti.
Minn sena għall-oħra din l-attività dejjem qed tikber, filwaqt li fi snin aktar riċenti l-festival taċ-ċikkulata beda jiġbed ukoll numru ta’ turisti. Apparti minn hekk, waqt il-festival se jkun hemm numru ta’ spettakkli u attivitajiet oħra għall-familja kollha.
F’kummenti ma’ Net News id-dulċier Tiziano Cassar, li jispeċjalizza fiċ-ċikkulata, spjega kif din is-sena hu ġie ispirat mill-film Gladiator – li l-maġġoranza tiegħu kien ġie miġbud f’pajjiżna.
Tiziano stqarr li se joħloq xena ta’ Russell Crowe waqt il-film Gladiator fejn s’issa din l-iskultura taċ-ċikkulata diġa’ għandha toqol ta’ 150 kilogramma. Huwa spjega wkoll li waqt il-festival se jkun qed ikompli jaħdem fuq din ix-xena u għalhekk dawk kollha li se jattendu se jkollhom iċ-ċans jaraw it-talent taċ-ċikkulatier b’għajnejhom stess.
Tiziano Cassar esprima xi jfisser għalih avveniment bħal dan illi jagħti l-opportunità sabiex dawk kollha involuti juru t-talenti tagħhom.
Il-festival taċ-Ċikkulata se jsir is-Sibt li ġej mill-ħamsa ta’ waranofsinhar ‘il quddiem u qed jittella mill-Kunsill Lokali tal-Ħamrun.
