Waqt Laqgħa mal-ġurnalisti, l-ASA tat dettalji dwar l-edizzjoni ta’ din is-sena tal-Enemed Waterpolo Cup 2024 kif wkoll il-parteċipazzjoni tat-timijiet irġiel u nisa f’LEN Challenger Cup.
Dettalji ingħataw mill-President tal-ASA Karl Izzo fejn ikkonferma li l-Enemed Cup ta’ din is-sena tibda l-Ħadd 29 ta’ Ottubru u tibqa’ sejra sad-9 ta’ Diċembru.
F’LEN Challenger Cup tal-irġiel, it-Tournament ta’ Kwalifikazzjoni se jsir bejn id-19 u t-22 ta’ Ottubru fil-Pixxina Nazzjonali f’Tal-Qroqq. It-tim Malti, li se jkun magħruf bħala Valletta Waterpolo, jibda l-impenji fl-ewwel ġurnata kontra KVT Komodor tal-Bulgarija. It-tim Malti huwa mmexxi mill-kowċ nazzjonali Milan Cirovic u l-assistant kowc Niki Lanzon.
Fil-kompetizzjoni flimkien ma’ Valletta Waterpolo qed jieħdu sehem ukoll EVK Zaibas (Litwanja), Cetus Espoo (Fillandja) Enka SC (Turkija).
Fiċ-Challenger Cup tan-nisa, l-ASA se tkun rappreżentata mit-tim ta’ Sirens. Ingħataw ukoll dettalji dwar Development Courses għar-Referees mifrux fuq jumejn. Tħabbar il-programm tal-kompetizzjonijiet tal-għawm li jinkludu kemm it-time trials, Kampjonati Nazzjonali kif ukoll Festivals tal-Għawm fejn uħud minn dawn il-kompetizzjonijiet se jsiru fil-Pixxina tal-Kottonera. Fil-Pixxina tal-Kottonera se jsiru wkoll il-kompetizzjonijiet tal-għawm artistiku mifrux mit-18 ta’ Novembru sa Ġunju 2024.
Preżenti għal laqgħa mal-ġurnalisti flimkien mal-President tal-ASA Karl Izzo kien hemm ukoll il-Kap Eżekuttiv ta’ Enemed Kevin Chircop.
