Raġel ta’ 58 sena qed jissielet għal ħajtu wara li kien involut f’inċident bejn żewġ vetturi li jintużaw biex jinġarru containers fil-Port Ħieles.
L-inċident seħħ kmieni l-Ġimgħa filgħodu għall-ħabta tas-1:30 fil-Port Ħieles, Birżebbuġa.
Il-Pulizija marret fil-post u minn investigazzjonijiet li saru rriżulta li seħħet ħabta bejn dawn l-inġenji li kienu misjuqa minn raġel ta’ 30 sena residenti r-Rabat u raġel ta’ 58 sena residenti Marsaskala.
Ir-raġel ta’ 58 sena ġarrab xi ġrieħi u kien assistit minn tim mediku tal-post kif ukoll
mill-membri mid-Dipartiment tal-Protezzjoni Ċivili.
Huwa ttieħed l-isptar Mater Dei permezz t’ambulanza sabiex jingħata l-kura meħtieġa u aktar tard ġie ċċertifikat bi ġrieħi serji u li jinsab fil-periklu tal-mewt.
Bil-każ kienet infurmata l-Maġistrat tal-Għassa Gabriella Vella li ħatret inkjesta, filwaqt li l-investigazzjonijiet tal-Pulizija għadhom għaddejjin.
Intant, fi stqarrija maħruġa mill-Freeport, intqal li minn naħa tagħhom qed jinvestigaw il-kawża tal-inċident.
