Minn kotba komiċi għal kotba tal-istorja… Kotba għal kull età fil-Festival Nazzjonali tal-Ktieb li sar fi tmiem il-ġimgħa fl-MFCC, Ta’ Qali, b’għażla vasta ta’ kotba għal kull età.
Fil-post tul il-ġranet li dan il-Festival kien miftuħ għall-pubbliku, diversi tfal kienu qed iqalbu qalb il-kotba, ifittxu dik l-istorja b’xi avventura ta’ karattri varji. Mistoqsija x’inhu l-iktar genre li jħobbu jaqraw, uħud mit-tfal li kien hemm preżenti tawna tweġibiet differenti, b’uħud jgħażlu genre partikolari, u oħrajn iħossu li jħobbu jaqraw il-maġġoranza tal-kotba, hu x’inhu l-genre tagħhom.
Apparti x-xiri ta’ kotba, wieħed seta’ jsib ukoll diversi attivitajiet, kemm għall-adulti u anke għat-tfal, fosthom sessjonijiet ta’ diskussjoni u anke sessjonijiet ta’ qari, b’dawk preżenti setgħu jaqsmu l-ideat tagħhom bl-isfond ta’ diversi kotba.
Iżda t-tfal, liema l-iktar kotba li jħobbu jaqraw, dawk bil-Malti jew bl-Ingliż? Mhux kull tifel u tifla kellu l-istess opinjoni, b’uħud jippreferu jaqraw bil-lingwa Maltija, u oħrajn jgħażlu li jmorru għal kotba bl-Ingliż hekk kif iħossu li għandhom għażla vasta iktar minn kotba Maltin.
Id-39 edizzjoni tal-Festival Nazzjonali tal-Ktieb saret bejn it-18 u t-22 ta’ dan ix-xahar, fit-tema għal din is-sena tkun #beyondbooks, bil-kitba timmanifesta ruħha permezz ta’ diversi pjattaformi, mhux biss permezz tal-qari iżda anke permezz tat-teatru, il-films, illustrazzjonijiet u anke l-awdjo.
Ritratti: Joseph Galea
