Neil Camenzuli
SLIEMA W…………………………….. 1
GŻIRA U………………………………… 0
Sliema W: R.Al Tumi, J.Borg, J.Minala, V.Plut (K.Abubakar 72’), M.Beerman, G.Alcino, D.Kouao (J.Engerer 72’), H.Freire, S.Gomes (A.Friggieri 86’), A.Awad
Gżira U: D.Zarkov, C.Conceicao, G.Bohrer, B.Azizi (J.Mendoza 45’), T.Aldama, Z.Scerri, M.Dias (A.Borg 63’), L.Macula, F.Romero, B.Borg, W.Texeiera (A.Sane 63’).
Imwissija: H.Freire 7’ (S), A.Bilario 20’ , C.Conceicao 28’, G.Bohrer 68’ (G)
Skorjaw: A.Awad 90′ (S)
Referee: Glenn Tonna
Assistenti Referees: Mitchell Scerri u Shaun Calleja
BOV Plejer tal-Logħba: A.Awad (S)
In-Nazzjon Plejer tal-logħba: J.Minala (S)
Sliema ħadu t-tlett punti kollha f’wieħed mill-iktar konfronti mistennija tal-ġurnata b’mod drammatiku hekk kif Abdulahi Awad spiċċa jkun l-eroj tas-Slimiżi meta sab ix-xibka fl-aħħar mumenti tal-partita sabiex ikkonferma r-rebħa għat-tim tiegħu.
L-ewwel tentattiv lejn il-lasta wasal għal Gżira ftit minuti mill-bidu tal-partita minn freekick mil-lemin ta’ Texeira, madankollu l-attakkant ma rnexxielux jsib il-lasta u tefa’ għoli.
Sliema rrispondew fit-22 minuta b’daqqa ta’ ras ta’ Plut mill-viċin tgħaddi għoli.
Fl-40 minuta tentattiv potenti fil-baxx minn barra l-kaxxa ‘l kbira tal-attakkant ta’ Sliema, Gomes jgħaddi ftit barra.
Ix-xutt ta’ Gomes meqjus bħala l-aqwa azzjoni tal-ewwel taqsima, bl-andament tal-partita jkun wieħed bilanċjat bejn iż-żewġ timijiet biex b’hekk l-ewwel taqsima tintemm f’parità ta’ bla gowls.
L-ewwel xutt lejn il-lasta għal Sliema wasal fit-52 minuta mix-xellug meta l-attakkant laterali Awad tefa’ fuq siequ l-leminija u ttanta xortih b’xutt minn barra l-kaxxa, bil-goalkeeper Zarkov isalva tajjeb.
Intervent doppju mill-goalkeeper ta’ Gżira fil-65 minuta, bl-ewwel save jasal minn konklużjoni mill-freekick baxx mogħti minn Minala mil-lemin, u bit-tieni intervent jasal mix-xutt ta’ Beerman li rriżulta f’korner.
Fis-70 minuta Joseph Minala b’xutt ieħor minn barra l-kaxxa ma jagħti ebda periklu lil Zarkov.
Save kruċjali ieħor minn Zarkov fit-80 minuta mix-xutt mill-viċin tas-sostitut Abubakar, bil-goalkeeper jsalva għal darb’oħra t-tim tiegħu f’din il-partita.
Samuel Gomes b’azzjoni oħra personali mix-xelllug idawwar xutt sabiħ indirizzat lejn ir-rokna ta’ fuq tal-lemin, pero l-konklużjoni tal-Brażiljan kienet ftit għolja, bl-iskor jibqa 0-0 sas-86 minuta.
Sliema skorjaw l-unika gowl tal-partita li waslet għar-rebħa fl-aħħar minuti meta l-attakkant laterali Abdullahi Awad xeħet fix-xibka b’xutt minn barra l-kaxxa wara li rċieva l-ballun f’saqajh meta d-difensuri ta’ Gżira ma rnexxielhom jikklerjaw il-periklu.
