Matthew Perry, magħruf l-aktar għar-rwol tiegħu ta’ Chandler Bing, fis-sitcom popolari Amerikana, “Friends”, instab mejjet f’daru stess.
Id-Dipartiment tat-tifi tan-nar ta’ Los Angeles qal li s-Sibt, fl-4:07 p.m. ħin lokali daħlet sejħa għal emerġenza ta’ salvataġġ tal-ilma. Perry li kellu 54 sena, instab mejjet fil-jacuzzi tad-dar tiegħu.
Barra minn hekk, sorsi qalu ma nstabet l-ebda droga fuq il-post u m’hemm l-ebda suspetti ħżiena madankollu, l-inċident għadu taħt investigazzjoni tal-Pulizija ta’ Los Angeles.
Matthew Perry ma kienx miżżewweġ u ma kellux tfal. Hu ħadem il-parti ta’ Chandler fis-serje tal-NBC li damet sejra 10 snin, flimkien mal-atturi Jennifer Aniston, Courteney Cox, Lisa Kudrow, Matt LeBlanc u David Schwimmer.
Fi stqarrija, Warner Bros. Television Group qalet “Ninsabu maħsuda bil-mewt tal-għażiż ħabib tagħna Matthew Perry. Matthew kien attur ta’ talent kbir u parti mill-familja Warner Bros. li ma jista’ jintesa’ qatt. L-impatt tal-ġenju komiku tiegħu se jibqa’ jinħass madwar id-dinja, u l-legat tiegħu se jibqa’ jgħix fil-qlub ta’ bosta persuni. Din hija ġurnata ta’ qsim il-qalb, u aħna nibagħtu l-kondoljanzi tagħna lill-familja tiegħu, lill-għeżież tiegħu, u lill-fans devoti kollha tiegħu.”
