Neil Camenzuli
HIBERNIANS…………………………….1
GUDJA U……………………………………0
Hibernians: I.Kone, K.Shaw, A.Attard, R.Bairam (O.Magro 90′), A.Hovhannisyan, S.Okoh, B.De Souza Silva (J.Degabriele 65’), C.Bonanni, G.Bastianos (G.Luiz Henrique 88’), E.De Souza Pereira (G.Arties 65’), A.Antwi
Gudja U: I.Sozer, S.Attard (S.Cipriott 65’) , M.Muchardi, J.Arthur, G.Mensah (S.Angulo 65’), C.Borg (O.Serrano 70’), E.Mendes (G.Zammit 90’), N.Tabone, K.Micallef, A.Toure, M.Esposito
Imwissija: E.Mendes 10’, A.Toure 33’, K.Micallef 75’ (G), K.Shaw 90′ (H)
Tkeċċa: K.Micallef 76’ (G)
Skorjaw: G.Bastianos 47’ (H)
Referee: Ishmael Barbara
Assistenti Referees: Duncan Spencer u Mark Ciantar
BOV Plejer tal-Logħba: Giannis Bastianos (H)
In-Nazzjon Plejer tal-logħba: Giannis Bastianos (H)
Hibernians irritornaw għar-rebħ permezz ta’ gowl fil-bidu tat-tieni taqsima tal-Grieg Giannis Bastianos bl-iskor finali jkun 1-0. Il-Pawlisti kellhom prestazzjoni sodisfaċenti, minn naħa l-oħra Gudja United iddiżappuntaw hekk kif ma rnexxielhom ikollhom tentattiv wieħed lejn ix-xibka ta’ Kone matul il-partita kollha u ma ħadu xejn minn din il-partita.
L-ewwel xutt lejn il-lasti wasal wara 13-il minuta logħob meta l-plejer ta’ Hibernians Bastianos ittanta xortih minn barra l-kaxxa, bil-ballun ma jagħti l-ebda diffikultà lil Sozer u jispiċċa f’idejh.
L-ewwel nofsija logħob pjuttost kwieta, b’Gudja United ma jirnexxielhomx ittellaw attakk denja ta’ nota, minn naħa l-oħra Hibernians iktar offensivi, bid-difiża ta’ Gudja tirreżisti tajjeb.
Hibernians perikolużi fit-42 minuta minn xutt baxx mil-lemin ta’ Bastianos jaħbat max-xibka minn barra.
Żewġ minuti wara tentattiv ieħor għal Hibernians din id-darba b’xutt ċentrali minn barra l-kaxxa tal-midfielder Bonanni jkun għoli wisq.
L-ewwel taqsima tintemm f’parità ta’ bla gowls, b’ Hibernians ikollhom l-iktar ċansijiet ta’ gowl, filwaqt li Gudja jilagħbu l-logħba tagħhom u jevitaw il-periklu kif jistgħu.
Hibernians ma damux ma fetħu l-iskor fit-tieni taqsima hekk kif fis-47 minuta Giannis Bastianos għeleb lil Sozer wara li avvanza tajjeb minn nofs id-difiża u xeħet ġewwa b’xutt kalm u baxx għar-raba’ gowl staġjonali tiegħu.
Save tajjeb mill-goalkeeper Sozer fil-51 minuta minn daqqa ta’ ras għolja tad-difensur Kurt Shaw.
Fis-76 minuta Gudja spiċċaw jilagħbu b’għaxra wara li l-captain Karl Micallef intwera żewġ karti sofor f’temp ta’ żewġ minuti, hekk kif intwera l-ewwel karta safra fil-75 minuta minħabba kummenti żejda lejn ir-referee, bit-tieni karta safra tasal 60 sekonda wara hekk kif Micallef kompla jirritalja.
Rebħa minima imma meritata għal Hibernians kontra Gudja United, b’ Bastianos ikun l-eroj tal-Pawlisti bil-gowl tiegħu fis-47 minuta.
