Id-dinja tal-opera se tilqa’ l-udjenzi fil-Belt Valletta għall-ewwel opera ta’ Mozart, “Apollo et Hyacinthus” li se ssir fi tmiem din il-ġimgħa. Din se tkun produzzjoni ta’ Festivals Malta b’kollaborazzjoni ma’ Teatru Manoel. Din il-produzzjoni eċċezzjonali twiegħed li se tkun ċelebrazzjoni ta’ briju mużikali u xhieda tal-wirt dejjiemi ta’ wieħed mill-akbar kompożituri fil-mużika tal-Punent.
Kemm id-dilettanti ta’ Mozart, kif ukoll dawk li jħobbu l-mużika, jistgħu jimmarkaw il-kalendarji tagħhom għal serata ta’ opra li ma tintesa qatt fl-10 u l-11 ta’ Novembru. Il-produzzjoni, li se tittella’ fuq il-palk storiku tat-Teatru Manoel, se tittrasporta lill-udjenza lejn era ta’ eleganza u opulenza permezz tad-direzzjoni mill-aqwa minn Fabio Ceresa.
Ibbażat fuq l-istorja mitoloġika tal-imħabba u t-traġedja popolarizzata mill-metamorfosi ta’ OVID, “Apollo et Hyacinthus” tirrakkonta l-istorja tal-alla Apollo u l-għożża profonda tiegħu għall-prinċep Spartan Hyacinthus, li jisfa maqtul wara li l-jolqtu discus. Din in-narrativa li ilha tiġi irrakkontata għal għexieren ta’ snin tesplora temi ta’ mħabba, għira, u destin permezz ta’ arias li jqanqlu s-sensi.
L-udjenzi jistgħu jistennew kast stellari ta’ talenti tal-opra lokali u internazzjonali, fosthom Federico Fiorio (Hyacinthus), Filippo Mineccia (Apollo) u Claire Debono (Melia) fi rwoli titulari, li jagħtu l-ħajja lill-karattri bl-ilħna u l-prestazzjonijiet emottivi tagħhom.
Din il-produzzjoni notevoli hija possibbli permezz tat-tim tal-Valletta Early Opera Festival li huwa kommess li jippromovi s-sbuħija tal-mużika klassika u li jżid mar-rikkezza tax-xena kulturali Maltija.
“Apollo et Hyacinthus” hija parti mill-Valletta Early Opera Festival li huwa organizzat minn Festivals Malta b ’kollaborazzjoni ma’ Teatru Manoel u bl-appoġġ tal-Istituto Italiano di Cultura La Valletta u tal-Ministeru tal-Wirt nazzjonali, l-Arti u l-Gvern Lokali.
