Colin Schembri
Starlites JSD………….54
Caffè Moak Luxol….57
(18-14)(15-11)(2-16)(19-16)
Kienu mumenti emozzjonanti għal-clan tal-Luxol hekk kif tmiem il-partita rahom jirbħu l-John Tabone Shield propju msemmija għal wieħed mill-fundaturi tagħhom. Kif mistenni l-partita kienet missielta ferm għalkemm Starlites kellhom tielet taqsima negattiva fejn fiha għamlu biss basket wieħed. Dan kien is-sitt suċċess ta’ Luxol f’din il-kompetizzjoni u ritorn għas-suċċess wara seba’ staġuni. Wara l-ewwel basket tal-partita minn Steffi De Martino, Luxol wieġbu permezz ta’ Tayler Bennett u Sarah Fenech Pace biex marru fuq quddiem. Starlites kellhom mument tajjeb b’run ta’ 10-2 bi trippli minn De Martino u Mikela Riolo biex ħadu l-vantaġġ. Wara li Bennett wieġbet għal Luxol, Starlites għamlu sitt punti oħra biex temmew l-ewwel sessjoni fuq quddiem 18-14. It-tieni taqsima kienet maqsuma fejn wara li Starlites kabbru l-vantaġġ għal sitt punti, Luxol kellhom risposta minn Bennett u Anna Fenech Pace biex għamlu l-iskor indaqs 23-23. Hawn Starlites kellhom mument tajjeb b’run ta’ 10-2 b’żewġ trippli ta’ De Martino flimkien ma’ Maria Bonett u Paige Cannon biex daħlu jistrieħu 33-25 minn fuq.
Fit-tielet taqsima l-partita nbidlet hekk kif Starlites irnexxielhom jagħmlu biss basket wieħed minn Riolo. Qablu, Luxol kellhom il-punti minn A. Fenech Pace, Josephine Diaby u Bennet biex naqqsu d-distakk. Għal kumplament tat-taqsima, kienu biss Luxol li għamlu l-punti minn Benett, Diaby u Sarah Fenech Pace biex temmew il-perjodu 41-35 minn fuq. Fir-raba’ taqsima, Starlites irkupraw u basket minn De Martino u trippla ta’ Andie Saliba wassluhom sa’ punt ‘l bogħod. Luxol wieġbu bi trippla ta’ Lisa Fenech Pace flimkien ma’ tlett punti minn oħtha Anna u reġgħu marru sebgħa minn fuq 47-40. Starlites komplew jitħabtu u kellhom il-punti ta’ Cannon, Riolo u Bonett flimkien ma’ trippla oħra ta’ De Martino. Il-partita bdiet toqrob lejn it-tmiem u bi 43 sekonda fuq l-arloġġ, il-ħames trippla ta’ De Martino naqqset id-distakk għal punt 54-55. Fl-attakk sussegwenti, Benett għamlet free-throw minn tnejn però Starlites ma rnexxielhomx isibu l-basket biex free-throw ieħor ta’ Sarah Fenech Pace għalaq il-partita fuq skor finali ta’ 57-54. Fi tmiem il-partita s-Sinjura Christine Tabone flimkien ma’ uliedha Philippa u Andrew ippreżentaw it-trofew lill-captain ta’ Luxol Josephine Diaby fost il-ferħ tal-partitarji tagħhom.
Starlites JSD: M. Zammit Cordina 4, M. Riolo 7, A. Saliba 5, M. Fenech, M. Bonett 8, S. De Martino 24, P. Cannon 6, P. Riolo, M. Sciberras, C. Cilia, S. Davies, C. Curmi.
Caffè Moak Luxol: M. Mercieca, L. Fenech Pace 3, T. Bennett 25, H. Galea, N. Vella, E. Abela, S. Fenech Pace 11, J. Diaby 7, J. Said, S. Sciberras 2, S. Farrugia, A. Fenech Pace 9.
Referees: Artun Bayraktar, Fiorentina Ciurariu, Nestor Rincon
