Jannar huwa x-xahar abbinat mal-Valletta Baroque Festival. Dan hekk kif matul dan ix-xahar f’pajjiżna se jittellgħu aktar minn 30 kunċert f’postijiet barokki differenti madwar Malta…. b’numru minnhom se jsiru fit-Teatru Manoel fil-Belt Valletta bejn l-11 u t-28 ta’ Jannar.
F’konferenza tal-aħbarijiet li saret proprju fit-Teatru Manoel, tħabbar li dan il-festival, li issa daħal fit-12-il edizzjoni tiegħu, se jkun mifrux fuq tliet ġimgħat u se jsir f’aktar minn 15-il post differenti madwar Malta.
Festival li se joffri programm artistiku b’saħħtu li jinkludi l-ikbar ismijiet tal-mużika Barokka f’varjetà wiesgħa ta’ kunċerti għal nies ta’ kull età.
Id-Direttur Artistiku ta’ dan il-fetival Kenneth Zammit Tabona spjega kif pajjiżna għandu attrazzjonijiet mill-isbaħ li se jservu bħala sfond biex jittellgħu numru ta’ programmi mużikali Barokki fosthom il-Kon Katidral ta’ San Ġwann, il-Palazz tal-Verdala u dak ta’ San Anton u l-Mużew Marittimu Malti. Bla dubju li matul dan il-festival tispikka l-mużika tal-kompożitur u mużiċist Johann Sebastian Bach.
Il-Festival ser jibda bl-oratorju ta’ San Ġwann ta’ Johann Sebastian Bach fil-Kon-Katidral ta’ San Ġwann, mill-Valletta Baroque Ensemble u Kor Malta, taħt id-direzzjoni mużikali ta’ Riccardo Bianchi, u jikkonkludi b’opra għat-tfal ta’ Pergolesi bl-isem ta’ La Serva Padrona bid-direzzjoni mużikali ta’ Sarah Spiteri, u direzzjoni tal-palk ta’ Jacob Piccinino. Il-festival għandu diversi stillel mużikali bħal Robin Pharo, Zefiro Ensemble, Alon Sariel, Holland Baroque with Wu Wei, Lucile Boulanger, Vox Luminis, u Les Contre-Sujets.
Wara s-suċċess tas-sena li għaddiet, se jerġgħu jirritornaw The Rock Troupers flimkien mal-ProMużika Ensemble bil-proġett tagħhom BaRock li ser jsir fit-Teatru Manoel. Il-festival ser jaħdem ukoll mal-Orkestra Filarmonika ta’ Malta u uħud mill-ifjen pjanisti f’Malta li flimkien se jdoqqu il-Bach Keyboard Concertos.
Waqt l-istess konferenza tal-aħbarijiet indaqqu siltiet mużikali Barokki mill-Maestro Michael Laus.
Il-Valletta Baroque Festival jibda fil-11 ta’ Jannar u jiġi fi tmiemu fit-28 tal-istess xahar… festival organizzat minn Festivals Malta b’kollaborazzjoni mat-Teatru Manoel u Visit Malta.
