Il-Qorti Kriminali ppreseduta mill-Imħallef Neville Camilleri għal darba oħra ma laqgħetx l-appell tal-Avukat Ġenerali u kkonfermat id-disa’ ħelsien mill-arrest li ngħata Terence Cini l-Ġimgħa, 10 ta’ Novembru mill-Qorti tal-Maġistrati.
Il-Qorti tal-Appell f’digriet li tagħat ċaħdet rikors tal-Avukat Ġenerali li fih intalab li Cini ta’ 38 sena minn Ħal Qormi jerġa’ jiġi arrestat wara li qalet li l-Qorti tal-Maġistrati mxiet mal-parametri tal-liġi meta laqgħet it-talba għall-ħelsien mill-arrest tiegħu.
Cini li fil-passat kien ikkundannat fuq droga kien akkużat u ngħata l-ħelsien mill-arrest mill-Maġistrat Astrid May Grima b’rabta ma’ każ ieħor fejn qed jiġi akkużat illi offra €47,000 lil persuna sabiex jixhed falz. Cini qed jiġi akkużat li kkorrompa xhud billi offra flus lil Michael John Mugliett biex ma jixhidx kontrih f’każ dwar traffikar ta’ droga.
Fil-qorti ngħad li peress li l-avukat Matthew Xuereb kien il-persuna li żar lil Mugliett fil-faċilità korrettivà ta’ Kordin huwa ġie mitkellem mill-pulizija u ta t-tagħrif dwar il-laqgħa ma’ Mugliett. Il-ħelsien mill-arrest ingħata lil Cini fuq diversi kundizzjonijiet simili għal meta ngħata għat-tmien każijiet preċedenti, li jinkludu li jiffirma fl-Għassa tal-Pulizija ta’ Ħal Qormi u jiddepożita s-somma ta’ 10,000 ewro u garanzija personali ta’ 20,000 ewro.
Fl-Appell li resssaq, l-Avukat Ġenerali tenna li l-imputat ġie akkużat li pprova jikkorrompi xhud tal-prosekuzzjoni jiem qabel ma kellu jixhed fil-konfront ta’ Cini. Qal li kemm-il darba jinstab ħati ta’ din il-akkużza, ikun fisser li kiser seba’ digrieti tal-ħelsien mill-arrest fi proċeduri oħra li għandu quddiem il-qrati kriminali.
Sostna li għalkemm l-akkuża fil-konfront ta’ Cini qed tinstema’ b’mod sommarju, xorta waħda hi gravi u dan ifisser li Cini mhux bniedem li tista’ toqgħod fuqu. L-appell tal-AĠ kien jgħid ukoll li l-Qorti tal-Maġistrati laqgħetlu t-talba għall-ħelsien mill-arerst b’depożitu ta’ €10,000 u garanzija personali ta’ €20,000.
Kien imtenni li dawn tħallsu dakinhar stess minn terza persuna. Sostna li waqt li Cini ngħata bosta opportunitajiet biex jirriforma lilu nnifsu, dan qatt ma ħataf din l-opportunità u għalhekk qatt ma wera li għandu l-ħeġġa u r-rieda li jbiddel ħajtu.
Fir-rispost tagħha, id-difiża ta’ Cini mmexxija mill-Avukati Franco Debono u Alberd Abela sostnew fost oħrajn l-prosekuzzjoni damet kważi tliet snin biex tipproduċi x-xhud ewlieni f’dan il-każ. Argumentat li r-rikors tal-Avukat Ġenerali kien mifni b’kontradizzjonijiet u jinkludi allegazzjonijiet infondati fosthom dik li Cini nqabad bosta drabi mill-pulizija jikser il-kundizzjonijiet tal-ħelsien mill-arrest.
Id-difiża qalet li Cini qatt ma nstab ħati ta’ din l-allegazzjoni Fid-deċiżjoni tagħha, il-Qorti tal-Appell Kriminali nnotat li waqt li hu minnu li Cini ġie mixli li kiser għadd ta’ digrieti mogħtija mill-qrati fejn ingħata l-ħelsien mill-arrest, fl-istess waqt qalet li hija tal-fehma li l-kundizzjonijiet li fihom ingħata l-ħelsien mill-arrest huma sodi u li jorbtu lil Cini f’każ li jikser xi waħda mill-kundizzjonijiet elenkati fid-digriet fejn ingħata l-ħelsien mill-arrest.
Kien fuq dawn il-binarji li l-Imħallef Camilleri ċaħad it-talba tal-Avukat Ġenerali biex jordna l-arrest mill-ġdid ta’ Cini. Fl-istess waqt fakkar lill-imputat bl-importanza li jsegwi l-kundizzjonjiet impost fuqu fejn ingħata l-pleġġ.
