Kumment fuq Facebook li appella biex id-Deputat tal-Oppożizzjoni Karol Aquilina jiġi “mħaġġar fis-Siġġiewi, f’nofs il-pjazza tar-raħal” wassal lill-awtur tiegħu kundanna għal diskors ta’ mibegħda. Alan Micallef ta’ 39 sena mis-Siġġiewi kien mixli quddiem il-maġistrat Ian Farrugia l-Ġimgħa filgħodu.
Micallef, li kien assistit mill-avukat Charlene Grima, ammetta l-akkużi. Grima infurmat lill-qorti li l-klijent tagħha kien lest li jiskuża ruħu, u ddeskriviet ir-rimarka bħala sempliċi bluha. L-avukat irrimarka li Micallef ukoll ħassar il-kumment immedjatament u kellu rekord kriminali nadif.
Aquilina, li deher bħala parte civile qal lill-qorti li kien jaf lill-imputat mis-Siġġiewi u li ma kellux kliem ħażin x’jgħid dwaru. Il-Qorti nnutat li Aquilina kien aċċetta l-apoloġija pubblika ta’ Micallef u li l-imputat kien spjega lill-pulizija fl-istqarrija tiegħu li ppubblika l-kumment f’mument ta’ rabja u ma kellux l-intenzjoni li jikkawża ħsara.
Waqt li kien qed jindirizza lill-imputat, li għandu tifla ta’ erba’ snin u li martu qed tistenna tifel ieħor , il-maġistrat wissieh li l-kliem għandu konsegwenzi. “Sew jekk b’intenzjoni jew ma kellekx l-intenzjoni li tikkawża ħsara, dawn it-tip ta’ kummenti joħolqu periklu kbir,” qal il-maġistrat.
“Jistgħu jinċitaw il-vjolenza. Illum ma tantx jużaw il-ġebel fil-parti tagħna tad-dinja, imma għandna armi oħra u rjus jaħarqu.” Il-qorti qieset l-onestà tal-imputat dwar dak li għamel, li qalet, se tkun riflessa fil-piena.
“Id-dmir tiegħek bħala missier żagħżugħ għandu jkun li tieħu ħsieb il-familja tiegħek u li tagħmel dak li hu tajjeb, mhux biss issegwi l-liġi – għax li tobdi l-liġi huwa l-minimu.” Micallef ġie mmultat €300 u ġie lliberat bil-kundizzjoni li ma jagħmilx reat ieħor għal perjodu ta’ sentejn.
