Il-Qorti ddikjarat li hemm biżżejjed provi biex żewġ ċittadini Sirjani jitqiegħdu taħt att ta’ akkuża dwar reati relatati mat-terroriżmu. Għaldaqstant huma issa għandhom jiġu proċessati quddiem ġurija. Farhan Mohammed Sheikh ta’ 29 sena u Abdullah Aliwi ta’ 23 sena, it-tnejn minn Homs fis-Sirja huma akkużati li xjentement u pubblikament inċitaw jew ippromovew atti ta’ terroriżmu, li rreklutaw nies biex iwettqu atti terroristiċi jew biex jivvjaġġaw barra minn pajjiżhom lejn kampijiet ta’ taħriġ terroristiku permezz ta’ taħriġ. jew taw struzzjonijiet lin-nies fl-użu ta’ splussivi, armi tan-nar jew armi oħra għal skopijiet terroristiċi.
Huma jinsabu akkużati wkoll li rċevew tali taħriġ bil-għan li jikkommettu jew jikkontribwixxu għal azzjonijiet terroristiċi u li joħolqu materjal ta’ propaganda terroristika. L-irġiel qed jaffaċċjaw ukoll akkużi oħra, relatati mal-inċitament, l-għajnuna jew il-kompliċità tat-twettiq ta’ reati relatati mat-terroriżmu, konfoffa kriminali, it-twaqqif jew is-sħubija f’organizzazzjoni li hija mħarrġa u mgħammra biex tavvanza ideal politiku. Fl-aħħar nett huma akkużati li jippromwovu, organizzaw jew iffinanzjaw organizzazzjoni kriminali.
L-avukati tal-akkużati kienu argumentaw li ma kienx hemm biżżejjed provi biex jiġu akkużati. Madankollu, il-Maġistrat Marseanne Farrugia ma qablitx, u kkwotat fit-tul minn sentenzi u pubblikazzjonijiet akkademiċi dwar il-livell ta’ prova meħtieġ għall-akkuża. F’każ ta’ ħtija s-Sirjani jistgħu jiġu kundannati għal għomorhom il-ħabs.
F’digriet li ngħata l-Ġimgħa, il-maġistrat iddikjarat li kien hemm biżżejjed provi li jistħoqqilhom l-akkużi li bihom qed jiġu mixlijin, u bagħatet l-atti lura lill-Avukat Ġenerali, li issa jiddeċiedi kif għandu jipproċedi. Il-Qorti qalet li għalkemm kienet konxja ta’ sentenzi li kienu ddeċidew li l-livell ta’ prova f’dan l-istadju jeħtieġ li tindika biss il-ħtija probabbli tal-persuni akkużati, kienet tal-opinjoni li l-livell ta’ prova għandu, fil-fatt ikun kemmxejn inqas – iddur xi mkien bejn ħtija possibbli u probabbli.
“Kull interpretazzjoni differenti tkun tfisser li m’hemm l-ebda distinzjoni fil-qasam tad-dritt ċivili fir-rigward tal-livell ta’ prova bejn deċiżjoni meħuda fuq bażi prima facie u deċiżjoni fuq il-mertu, għaliex iż-żewġ proċeduri għalhekk ikunu jeħtieġu prova sal-livell ta’ probabbiltà. ”
Din l-interpretazzjoni ovvjament twassal għal konklużjonijiet assurdi f’kawżi ċivili, qalet il-qorti, u allura l-oneru tal-prova għal prima facie kellu jkun inqas minn dak fuq bilanċ ta’ probabbiltà. Il-Maġistrat qalet li temmen ukoll li t-tifsira ta’ ‘livell ippruvata fuq il-prima facie’ għandha tkun l-istess fis-sistema ġuridika Maltija kollha, “kull fejn tintuża, kemm fil-kamp tal-liġi ċivili kif ukoll dik kriminali.”
Għall-finijiet tal-każ inkwistjoni, qalet il-maġistrat, kien biżżejjed li l-qorti tkun sodisfatta li l-prosekuzzjoni ġabet biżżejjed provi li jistgħu “legalment u raġonevolment” iwasslu Imħallef, Maġistrat jew ġurija biex isib il-ħtija, anke jekk dik il-konklużjoni hi waħda li trid tiġi diskussa.
Waqt li applikat dan għall-każ quddiemha, il-Maġistrat Farrugia osservat li l-provi esebiti rriżultaw li ż-żewġ imputati kellhom fuq il-mobile materjal tagħhom relatat mal-grupp terroristiku tal-Istat Iżlamiku, “inkluż filmati ta’ nies maqtula minn dan il-grupp terroristiku, innijiet Iżlamiċi, relatati ma’ dan il-grupp terroristiku u abbonamenti fuq iċ-channel Telegram biex jirċievu materjal relatat ma’ dan il-grupp terroristiku.”
Il-Qorti nnutat li d-difiża ma kinitx qed tikkontesta dan l-istat ta’ fatt, iżda kienet qed targumenta li s-sempliċi fatt li kienu rċevew il-materjal ma kienx jikkostitwixxi r-reati kriminali li huma akkużati bihom. “Skont id-difiża, l-akkużati ma kinux qed jippromwovu jew ixerrdu l-interessi tal-Istat Iżlamiku u s-sempliċi fatt li jkollhom simpatiji ma’ grupp terroristiku ma kienx jikkostitwixxi reat kriminali,” innotat il-qorti.
Waqt li saħqet li ma kellhiex is-setgħa li tittratta l-merti tal-każ inkwistjoni, il-qorti qalet li wara li rat il-provi esebiti s’issa, kienet sodisfatta li kien hemm każ x’jiġi iwieġeb li jistħoqqlu aktar investigazzjoni. Għaldaqtant bagħtet l-atti tal-kawża lill-AĠ sabiex titfassal att ta’ akkuża u l-irġiel jiġu pproċessati quddiem il-qorti kompetenti, f’dan il-każ ġuri.
L-avukati Jose Herrera, Franco Debono, Matthew Xuereb u Martina Herrera huma l-avukati difensuri.
L-Ispetturi Jean Paul Attard u Zachary Zammit qed imexxu l-prosekuzzjoni, assistiti mill-avukati Antoine Agius Bonnici, Francesco Refalo u Rebekah Spiteri mill-Uffiċċju tal-Avukat Ġenerali.
