Tork ta’ 30 sena residenti San Ġwann u li l-aħħar xogħol li kellu kien mat-tarzna ta’ Palumbo, ġie mixli quddiem il-Maġistrat Ian Farrugia bl-attentat ta’ qtil ta’ raġel ieħor aktar kmieni dan ix-xahar f’Paceville. L-Ispettur Niko Zarb li ressaq lil Adem Katirciogly qal lill-Qorti li fit-12 ta’ Novembru li għadda, il-pulizija rċevew informazzjoni li fi Triq Santa Rita, ġewwa Paceville kien hemm raġel li kien għadu kif attakka ieħor b’sikkina.
Sostna li l-pulizija marru fuq il-post u sabu lill-akkużat b’żewġt iskieken moħbijin fuqu, waħda fil-komma u l-oħra fil-kalzetta. Il-prosekutur qal li l-akkużat ittieħed l-isptar Mater Dei għax hu wkoll kellu xi ġrieħi u ġie mitkellem mill-pulizija dwar il-każ.
Kompla jgħid li l-pulizija taw lill-akkużat il-police bail sakemm kien l-isptar u komplew jiġbru aktar provi li wrew li Adem Katirciogly ried joqtol lir-raġel l-ieħor. Il-pulizija xlewh bl-attentat ta’ qtil ta’ Stevan Dimic u li kkważalu ġrieħi gravi.
It-Tork ġie mixli wkoll li kkaġuna biża’ f’persuni oħra li kienet se tintuża vjolenza kontrihom u li ħebb għalihom. Ġie mixli wkoll li kellu fuqu arma, li ġarr arma mingħajr permess u li kiser il-paċi pubblika. Il-pulizija akkużawh ukoll li wettaq reat waqt li kien waqt perjodu ta’ sentenza sospiża li kien ingħata f’Ġunju tal-2021.
L-akkużat wieġeb li mhux ħati tal-akkużi kontrih u f’dan l-istadju l-avukat Leontine Calleja ma talbitx li jingħata l-ħelsien mill-arrest. Il-Qorti ordnat li jibqa’ jinżamm taħt arrest preventiv fil-ħabs. Id-difiża talbet wkoll biex il-prosekuzzjoni tressaq ix-xhieda mportanti kemm jista’ jkun malajr.
