Il-Maġistrat Astrid May Grima mmultat Franciż €2,000 wara li sabitu ħati li bil-vettura tiegħu tajjar sewwieq ta’ mutur u kkaġunalu ġrieħi gravi. Jean Pierre Antoine Speciel li kien tressaq il-Qorti mill-Ispettur Ian Vella nstab ħati li fis-16 ta’ Ottubru 2022, fil-Ħamrun-Marsa bypass, saq karozza b’manjiera perikoluża u naqas li jżomm man-naħa tax-xellug tat-triq u li jagħmel sinjal meta kien qed ibiddel id-direzzjoni.
Il-vittma xehed li kien għaddej bil-mutur kmieni wara nofs inhar ma’ martu minn taħt il-pont il-ġdid meta xegħel l-indicator fid-direzzjoni lejn Ħal Qormi u dak il-ħin karozza li kienet sejra fid-direzzjoni ta’ Santa Venera ġibdet għal fuqu.
Is-sewwieq tal-mutur qal li huwa għafas iż-żewġ brejkijiet f’daqqa imma l-akkużat laqtu bil-konsegwenza li hu u martu waqgħu. Kompla jgħid li l-akkużat għall-ewwel saq ftit metri oħra imma mbagħad waqaf biex jara x’ġara.
Qal li sofra minn ksur u dam tliet ġimgħat ma jmurx għax-xogħol waqt li martu ma weġġgħatx. Minn naħa tiegħu l-akkużat qal li huwa kien għaddej ma’ martu u kien qed isegwi l-GPS, permezz tal-mobile ta’ martu, li indikalu biex jikser fuq ix-xellug.
Huwa qal li ħares fil-mirja u ra karozza warajh u meta kiser kif qallu l-GPS sema’ ħoss fuq in-naħa ta’ wara tal-karozza. Kif ħareġ ra mutur mal-art u raġel jistrieħ ma’ ħajt u mara tkellmu u baqa’ fuq il-post sakemm waslu l-Pulizija.
Xhud importanti f’din il-kawża kien pulizija li dak il-ħin ma kienx xogħol u li nzerta għaddej mit-triq fejn qal li ra l-karozza taqleb il-karreġġjata mingħajr ma nxtegħel l-indicator u laqtet lill-mutur fejn anke qal li waqaf jagħti l-għajnuna.
Il-Maġistrat Grima, ikkonkludiet li mill-provi rriżulta li l-akkużat qaleb minn karreġġjata għal oħra mingħajr ma xegħel l-indicator bil-konsegwenza li laqat lill-vittma. Għaldaqstant sabet lill-Franċiż ħati tal-akkużi miġjubin kontrih u mmultatu €2,000 waqt li skwalifikatlu l-liċenzja tas-sewqan għal tmien t’ijiem.
